بەختی کورد
لە کتێبی:
دیوانی عوسمان عوزێری
بەرهەمی:
عوسمان عوزێری (1936-1966)
2 خولەک
733 بینین
بەختی کورد تاریک و تونە نایەتە دەفتەر خواسەکەی
وەکوو هەزار و یەک شەوە دوورودرێژە باسەکەی
ئەی لاو و پیر و کیژوڵەی ئەم کاتە بەدبەخت و شوومە
لاپەڕەی میژوو بگەڕێ گەر نیشتمانی و ڕاست ئەکەی
***
دێنە بەر چاوت چەندەها قۆرت و خۆشی، جەنگ و هەرا
چەن ئازادی و نەڕەشێری و چەن زەلیلی چەن ئیفتەرا
لەو ساوە هەردەم بە جۆرێ ئازادیی ژینمان چەشتووە
هەتا ئێستا هەر ئەیچێژین هۆشمان نەهاتووە بەسەرا
***
فەلەک یاریمان پێ ئەکا و ئەمانخاتە باسوخواس
هەردەم بە جۆرێ بووینەتە گیسکەکەی هەیاسی خاسکەس
دەمێ شادی و دەمێ گرین، دەمێ هەرا و دەمێ ئەسرین
بەوەش وازمان لێ ناهێنێ خۆی لێ گرتووینەتە مەڵاس
***
بەڵام سوار ئەو سوارچاکەیە کە کۆڵ نەدا لە مەیانا
هەرچەن براکەی بینی لە خوێن و قوڵپەی گریانا
ئێستاش ئێمە لە مەیانی جەنگ و زۆراین لەگەڵ ژین
پێویستە هەر سەرکەوین و پێمان بڵێن هۆزی دانا
***
هیچ بەوە دڵسارد نەبن کە ڕەهێڵە و تەرزە و باران
نیوەمانی خستە چۆڵی بەبێ یانە لە کۆساران
گەر ڕاست ئەکەن دەستیات بگرن لە خواردن و دەرەتانا
یاریدەریان بەن پڕ بەدڵ تا دێنەوە دۆخی جاران
***
گریانم بۆیان دێت پڕ بەدڵ کە ڕۆڵەی کورد و وەها بن
نەک هەر من بەتەنیا بگریم پێویستە ئێوەش هەروا بن
چونکە وەکوو ئەڵێن، ئەگەر برا لە پشتی برا بێ!
کەواتە ئێمەش هەر براین یەک گرن و دڵنیا بن
***
یەک گرتنە ئامانجمان ئەی هاوخوێنی شیرینانم
قەزای هەموو کوردستان و کورد بکەوێ لە گشت گیانم
کەواتە بە هەموو جۆرێ یاریدەی لێقەوماوان
پێویستی سەر شانمە و بۆ ئەوان پەرێشانم