حاجی دشوارەن
لە کتێبی:
شیعرەکانی حیلمی کاکەیی
بەرهەمی:
حیلمی کاکەیی (1882-1966)
2 خولەک
276 بینین
حاجی دشوارەن ...
ئەی ڕاگە سەختەن غایەت دشوارەن
جە هەزار یەکێ پەی یار خەمخوارەن
ماباقی خودبین هەر جە ئینکارەن
قیسمێ مونکیرەن دەروون پڕ ژارەن
قیسمێ خوڵاسەن میزان تەیارەن
پەناو ئومێدم وەقاپی یاڕەن
هەرچەن داد مەکەم یار نادیارەن
مەگەر ساحێبم چەنەم بێزارەن
جەو بۆنە وەیتەور ڕەفێقم مارەن
گیر وەردەی گەرداب چارم ناچارەن
یاری نەمەندەن دەور دەور غارەن
چەمم ئینتیزار شای مەدەد کارەن
ئاوێنەی دڵم پڕ چە غوبارەن
دەردم کارییەن هەم نادیارەن
ناپوختە قاڵب زەمین بەیارەن
ڕۆح وە دەست نەفس هەر چە ئازارەن
گفتارم چون دوڕ جە تۆی عەمارەن
بازاڕم کەساس وەبێ توجاڕەن
دەخیلەن حاجی ئینە چ کارەن
مورغ دەروونم جە ئاهـ و زارەن
دۆستان تەعنە کێش کووچە و بازاڕەن
دوشمنان لایق تەخت زەڕ کارەن
تووتی خۆش سوخەن وەبێ مینقارەن
بولبولان مەحبووس قەفەسی تارەن
فەقیران هیلاک جە ئاهـ و زارەن
دەوڵەمەند مەغروور ساحێب وەقارەن
عەجەب زوڵمەتەن دەیجوور تارەن
لەشکر پەرگەندە وەبێ سەردارەن
گەلە بێ شوان گورگان هەزارەن
گوسفەندان وەدەست گورگان قەلارەن
تا وەعدە نەیۆ بێخود گفتارەن
لابود ئەی ڕمووز سەبت تۆمارەن
جە گشت خسووسێ یار خەوەردارەن
سەیاد حازرەن خەریک شکارەن
پەی قەتڵ یاران جە قین و قارەن
زەبوونی خەڵکان وەبێ شومارەن
نەواچی مەڵڵا هەرزە گوفتارەن
ئوستادم واتەن وەیتەور قەرارەن
جە دمای کوشتار دەور دەور یارەن