ḧacî dişwaren
From the Book:
Şî’rekanî Ḧîlmî Kakeyî
By:
Hilmi Kakeyi (1882-1966)
2 minutes
428 views
ḧacî dişwaren ...
ey řage sexten ẍayet dişwaren
ce hezar yekê pey yar xemxiwaren
mabaqî xudbîn her ce înkaren
qîsmê munkîren derûn piř jaren
qîsmê xułasen mîzan teyaren
penaw umêdim weqapî yařen
herçen dad mekem yar nadyaren
meger saḧêbim çenem bêzaren
cew bone weytewr řefêqim maren
gîr werdey gerdab çarim naçaren
yarî nemenden dewr dewr ẍaren
çemim întîzar şay meded karen
awêney diłim piř çe ẍubaren
derdim karîyen hem nadyaren
napuxte qałb zemîn beyaren
řoḧ we dest nefis her çe azaren
giftarim çun duř ce toy ’emaren
bazařim kesas webê tucařen
dexîlen ḧacî îne çi karen
murẍ derûnim ce ah û zaren
dostan te’ne kêş kûçe û bazařen
duşminan layq text zeř karen
tûtî xoş suxen webê mînqaren
bulbulan meḧbûs qefesî taren
feqîran hîlak ce ah û zaren
dewłemend meẍrûr saḧêb weqaren
’eceb zułmeten deycûr taren
leşkir pergende webê serdaren
gele bê şwan gurgan hezaren
gusfendan wedest gurgan qelaren
ta we’de neyo bêxud giftaren
labud ey řimûz sebit tomaren
ce gişt xisûsê yar xewerdaren
seyad ḧazren xerîk şikaren
pey qetił yaran ce qîn û qaren
zebûnî xełkan webê şumaren
newaçî mełła herze guftaren
ustadim waten weytewr qeraren
ce dimay kuştar dewr dewr yaren