کە من شیروانە جێگەم بێ لە فیردەوسی بەرینم چی
لە کتێبی:
دیوانی مینە جاف
بەرهەمی:
مینە جاف (1911-1965)
1 خولەک
302 بینین
کە من شیروانە جێگەم بێ لە فیردەوسی بەرینم چی
کە یار هاوڕێ و ڕەفیقم بێ لە وەسڵی حووری عینم چی
کە شەهدی لەعلی لێوی دڵ ستانم دەسکەوێ جا من
لە ئاوی کەوسەری جەننەت لە شەهد و ئەنگەبینم چی
کە باڵای سەرو و باڵای یار لەبەر چاوم ببێ مەوجوود
لە سەرو و عەرعەر و تووبا و تاووسی ڕەنگینم چی
لە زوڵف و پرچی ئەو شۆخەم بە لای ملیا ببێ پەخشان
لە پرج و کاکۆڵی تاتای غوڵامی مەهجەبینم چی
کە لەنجە و لاری ئەو یارەم لەبەر چاو بێ ئەمن ئاخر
لە لەنجەی تووتی و قومری و کەوی گەردەن خەتینم چی
تەماشای خاڵی شین و چاوی بیماری نگارم کەم
لە سەیری سۆسەن و نەرگس لە موشک و یاسەمینم چی
لە دنیادا کە من شیروانە وەک فیردەوسی پێشوو بێتە بەر چاوم
لە پاریس و لە ئاستانە وە یا تاران و چینم چی
کە شوعلەی کوڵمی ئەو شۆخەم بدات پرتەو بە گشت لایێ
لە شیرین و لە لەیلا و زولەیخا خۆرنشینم چی
کە من وەک مینەناسناوی ئەدەبی ماچی کوڵمی یاری خۆم نەسیبم بێ
لە یادی شەربەتی لیمۆ وە یا ئەسکەنجەبینم چی