ئاخ نەمردایەم ئازیز گیانەکەم
لە کتێبی:
دیوانی مینە جاف
بەرهەمی:
مینە جاف (1911-1965)
1 خولەک
299 بینین
ئاخ نەمردایەم ئازیز گیانەکەم
تاقە گوڵەکەی باغی ژیانەکەم
ئەم جووتە چاوەم پڕ لە خوێناوە
لە دووریی تۆوە کوێر و لێڵاوە
ئازیز گیانەکەم وە ئایەی شەریف
سوێن وە موعجیزەی ڕەسوولی عەفیف
تا دەستی دێوی ڕەقیبی بەدخوو
بیتەنێ پەردەی تەلیسم و جادوو
لەت نەکرێ بە تیغ پەی نەکرێ بە شیر
هەزار تامەزرۆی وەک من ئەبێ پیر
نابینین شێوەی بەژنی باڵاکەت
نانیشین وە شاد لە سای ئاڵاکەت
دەبێت هەر بگرین بمرین لە دووری
دڵمان وە گریان بدەین سەبووری
سا خوا توخوا لەبەر پێغەمبەر
بیکە بە خاتر سەییدی سەروەر
دەلیلێ بە خێر بنێرە بۆمان
پەل پەلی بکا دێوی بێ ئامان
ڕێمان نیشاندا بەرەو ڕووی مراد
بە وەسڵی باڵای ئازیر بین دڵشاد