سروەت بام بازەکەی سەحەر
لە کتێبی:
دیوانی مینە جاف
بەرهەمی:
مینە جاف (1911-1965)
2 خولەک
353 بینین
سروەت بام بازەکەی سەحەر
وادەی یارییەن درەنگی مەکەر
بویە وە تاجیل نە سەر کۆساران
درەنگی مەکەر نە تۆی گوڵزاران
نەک بشی وە سەیر سەفای بای کاوان
یا وە تەماشای شاخەی شەتاوان
ئەر سەر سەیرانگای گوڵان دڵگیر بۆ
دەخیل سەد دەخیل منت جە بیر بۆ
وە وەخت و بێ وەخت نە ڕاگە و بێڕا
نەکەری درەنگ نە چۆڵ و سارا
تا مەیۆ وە ڕات سەر کۆ و کۆساری
نە پای ئەو کێودا شیرین دیاری
دیاری دڵگیر چون سارای خەتا
گەل گەل غەزالان مەگێڵو وە پیا
دەشتێ منمانۆ وە سارای بەهەشت
نەهرێ چون کەوسەر جارییەن نەو دەشت
مەوینۆ تێدا جۆق جۆق گوڵاڵان
خەیمەش هەڵداگەن نەو دەشت و ئاڵان
مەشنیۆ شەوبۆ نە مابەینی گوڵ
پەخشی و پەشێوەن ئەگریچەی سونبوڵ
نەرگس تاجی زەڕ نیاگەن وە سەر
بیەن وە سوڵتان نەو وڵگە و کیشوەر
تکا کەر نەوجا نە پای ئەو هاموون
قەسرێ سەر بەردەن وە ساقی گەردوون
چون قەسر قەیسەر نەو دەشت و سارا
سەر ساوان وە چەرخ چون تاقی دارا
جارییەن نە پای تاقی دڵ ئارا
شتێ خۆش مەنزەر ساف و گەوارا
نە تۆی سافایی ئەو سارای شیرین
منمانۆ وە چەم چەن کوشکی ڕەنگین
کاتێ وەی تاریف شوێن و وڵاتێ
ئاما وە سەر ڕات مەنانۆ ساتێ
مەکەرۆ درەنگ تۆ نەو سەر کۆسار
عەمبەر ئامێز کەر ئەو دەشت و گوڵزار
وە بۆی سروەکەی بۆ عەبیرینت
گوڵاو پاشی کەر ڕاگەی شیرینت
بڵا وە نەرمی بکەرۆ گوزەر
بشێو وە ماوا و نشینگەی دولبەر
ئەر وێت بەڵەد نیت تا پێت دەم نیشان
ئێدەن نیشانەی مەنزڵگەی جانان
قەسرێوەن دڵگیر قەڵای خۆرهەڵات
دووهەم قەسرێوەن تا مەبۆ وە ڕات
چون یاوای وە سەحن تەلاری شایی
مەوینووی تاقی سەیوان خەتایی
گوزەر کەر نە تۆی تاقی زەڕنیگار
نەو تاقا خەفتەن جەیرانی تاتار
وەختێ تۆ دیای وەو تاق و مەسکەن
بدۆ نە دەماخ نووری دیدەی مەن
نیشات و وە ناز یەخەی کەتانش
بێدار کەر نە خاو سیا چەمانش
وەختێ خێزیا ئەو نازاری چین
پۆشا وە باڵای کاڵای عەبیرین
ئەی زەلیلی من ئەی سەختی دەردم
ئەی ئێش دەروون هەناسەی سەردم
بەیان کەر جە لای ئاهووی خوتەن بوو
نازاری سەر خێڵ شوخی هەڵۆ خوو
واچە ئازیز گیان بینایی چەمان
مینەناسناوی ئەدەبیی بێچارە پێ دەوام کەیان