sirwet bam bazekey seḧer
From the Book:
Dîwanî Mîne Caf
By:
Mine Jaff (1911-1965)
2 minutes
469 views
sirwet bam bazekey seḧer
wadey yarîyen direngî meker
buye we tacîl ne ser kosaran
direngî meker ne toy gułzaran
nek bişî we seyr sefay bay kawan
ya we temaşay şaxey şetawan
er ser seyrangay gułan diłgîr bo
dexîl sed dexîl minit ce bîr bo
we wext û bê wext ne řage û bêřa
nekerî direng ne çoł û sara
ta meyo we řat ser ko û kosarî
ne pay ew kêwda şîrîn dyarî
dyarî diłgîr çun saray xeta
gel gel ẍezalan megêłu we pya
deştê minmano we saray beheşt
nehrê çun kewser carîyen new deşt
mewîno têda coq coq gułałan
xeymeş hełdagen new deşt û ałan
meşnyo şewbo ne mabeynî guł
pexşî û peşêwen egrîçey sunbuł
nergis tacî zeř nyagen we ser
byen we sułtan new wiłge û kîşwer
tika ker newca ne pay ew hamûn
qesrê ser berden we saqî gerdûn
çun qesir qeyser new deşt û sara
ser sawan we çerx çun taqî dara
carîyen ne pay taqî dił ara
şitê xoş menzer saf û gewara
ne toy safayî ew saray şîrîn
minmano we çem çen kuşkî řengîn
katê wey tarîf şwên û wiłatê
ama we ser řat menano satê
mekero direng to new ser kosar
’ember amêz ker ew deşt û gułzar
we boy sirwekey bo ’ebîrînit
guław paşî ker řagey şîrînit
biła we nermî bikero guzer
bişêw we mawa û nişîngey dulber
er wêt bełed nît ta pêt dem nîşan
êden nîşaney menziłgey canan
qesrêwen diłgîr qełay xorhełat
dûhem qesrêwen ta mebo we řat
çun yaway we seḧin telarî şayî
mewînûy taqî seywan xetayî
guzer ker ne toy taqî zeřnîgar
new taqa xeften ceyranî tatar
wextê to dyay wew taq û mesken
bido ne demax nûrî dîdey men
nîşat û we naz yexey ketanş
bêdar ker ne xaw sya çemanş
wextê xêzya ew nazarî çîn
poşa we bałay kałay ’ebîrîn
ey zelîlî min ey sextî derdim
ey êş derûn henasey serdim
beyan ker ce lay ahûy xuten bû
nazarî ser xêł şuxî heło xû
waçe azîz gyan bînayî çeman
mînePen namey bêçare pê dewam keyan