هانا هامسەران جە ئێشی دووری
لە کتێبی:
دیوانی مینە جاف
بەرهەمی:
مینە جاف (1911-1965)
1 خولەک
691 بینین
هانا هامسەران جە ئێشی دووری
جە زامانی سەخت کەردەی مەهجووری
تک تک مەتکیۆ هووناو نە جەرگم
دایم نە سزای شەرارەی مەرگم
شادی کۆچش کەرد نە ئقلیمی دڵ
خەم دڵشاد بیەن وە ماوا و مەنزڵ
خەم و تەم و هەم جەلام بیەن جەم
ئەسرش هووناوەن سەرچاوەکەی چەم
چەمانم ئەسرین هووناو مەڕێزۆ
دووی هەناسەی سەرد نە دڵ مەخێزۆ
جە سزای زامان دڵەی پڕ جە ژار
جە گەرمیی دەروون جە شەرارەی نار
وە کەباب بیەن جەستەم سەر تا پا
وێنەی زووخاوەن مۆخم جە ئازا
خەم نە جەرگەی جەرگ گیان نە جەرگەی خەم
تەن کاسەن وە خەم خەمانم هاودەم
پەی شوڵەی ڕووخسار ئەو ئارامی گیان
جەستەم مەگریۆ چون شەمعی شەوان
هامسەران ئامان بکەروون چارم
بکەروون عیلاج دڵەی ئەوگارم
ڕەحمێ کەن وە حاڵ مینەناسناوی ئەدەبیی سیابەخت
تا کەی بناڵۆ وە زامانی سەخت