ڕەفیق واچە پێم
لە کتێبی:
دیوانی مینە جاف
بەرهەمی:
مینە جاف (1911-1965)
2 خولەک
448 بینین
ڕەفیق واچە پێم ...
بایو پەی ڕەزای خوا واچە پێم
لوای وە پێشواز عێلی جافەوە
نەدیت نازارێ بەی ئەوسافەوە
نەدیت ئاهووکەی توونی هەردەی دڵ
چەم سیاوەکەی سەر دەلیلەی دڵ
نەدیت ئەو دلبەر ئارامی گیانم
مایەی زینگانی و ڕۆحی ڕەوانم
نەدیت سەر باشقەی گشت کوردەواران
نازاری سەر خێڵ دیدە خوماران
ئەو گوڵباغی باغ سەهەن پەروەردە
تەشریف شەفایی ئێڵاخان بەردە
ئەو باڵا عەرعەر پەروەردەی گوڵزار
ئەو تووبا قامەت ئەو سەروی سەلار
واچە مەر نەدیت ئەو نەونەمامە
ئەو تەرلان تەواو قومری خەرامە
نەدیت شیفای دەرد دڵەی غەمگینم
نەدیت مایەی کەیف ڕووی سەرزەمینم
مواچای لوای تۆ وە نووای عێڵ
نەیاوای وە کۆچ شۆخەکەی سەر خێڵ
نەدیت لەیل ئاما جە ئێلاخەوە
چون شابازی وەحش وە ڕووی شاخەوە
نەدیت بەو ئەبرۆی هیلالی یەکەم
بەو ڕوخسار وێنەی بەدری دوو هەفتەم
تۆ یاوای وە کۆچ وە ڕاگوزارۆ
نەدیت قیبلەکەم وە تلمیت بارۆ
بەو بەژن و باڵای شۆخ و شەنگەوە
بەو شێوای شیرین لەیلا ڕەنگەوە
بەو غەمزەی دڵ دۆز چون خەدەنگەوە
بەو دیدەی خون ڕێز پا وە جەنگەوە
چون ئاهووی خۆتەن نەسا سڵ کەردە
ڕوومەت وێنەی مانگ بێ پەنا و پەردە
نەدیت نەپەرسا جە حاڵەکەی من
جە کزەی دەروون زووخاڵەکەی من
نەپرسا هەواڵ خەستەی مەیلەکەش
وە سزای دووریی دەروون کەیلەکەش
جە سەیلی زووخاو دڵەی نمینم
جە زاری و فەزەع زایەڵە و شینم
نە چەخماخەی ئێش زامانی کاریم
جە ناڵەی وە سۆز شەوان بێداریم
ئاما جە ئێلاخ وێش وێنەی لەیل
نەوات ها جە کۆ قەیسەکەی دوجەیل
عەوداڵی خەمبار زەدەی دەردەکەش
وە سزای دووریی دەروون بردەکەش
نەوات ها جە کۆ مینەناسناوی ئەدەبی ی سیابەخت
بیماری دڵ ڕێش گرتەی زام سەخت