میرم حسێن بەگ تەرفەنەی شاران
چوونە سەر قەڵای پاشا
لە کتێبی:
دیوانی مینە جاف
بەرهەمی:
مینە جاف (1911-1965)
2 خولەک
371 بینین
میرم حسێن بەگ تەرفەنەی شاران
وامنەی جەگەل شاو شەهریاران
جەی دەم دارم کەفت وە شوێن هەوارێ
ئەو هەوارە دیم قەسر و تەلارێ
خەیلێ سەرسام بیم وەو هەوارەوە
وەو قەسر و قەڵای شاهان وارەوە
ناکا دیم کاچێ لای ئەو قەڵاچە
وە ناچار کەفتم جە سای ئەو کاچە
گیان وە ئێش و خەم دڵ وە تاسەوە
دەم وە تەپ و دووی سەرد هەناسەوە
پرسام جەو قەڵای کۆنەی وێرانە
جەو دەزگای شاهی و جەو هەوارانە
واچە پێم جە کێ یادگارەنی
جای بەزم و شکۆی کام سەردارەنی
ئەو قەڵا وەی ڕەنگ وە من داجوار
ئاهر دا وە گیان، دڵ کرد وە کەواو
وات نشینگەی تەخت میرانی جافم
جاگەی نازاران مشکین کڵافم
نامم مەشهوورەن وە قەڵای پاشا
سیروان سەیرانگام پەرێی تەماشا
نام ناوە پێم جای کام گرۆیە
هەوارگەی کامین خاوەن شکۆیە
وە پێم نومانا شوکری سەرداران
بەزم و دەبدەبەی میر و ناوداران
جە من کەرد مەعلووم تویش جەو یارانی
یەکێ جە میران ئەو هەوارانی
واتەی من و ئەو وە زوانی جافی
پەی تۆ مەکیانوم من وە دڵسافی
لاکن من جە وێت مەپەرسووم ئەحواڵ
پێم بدەر خەوەر گەورەی گەورە ساڵ
واچە کوێ کەفتەن ئەو سەردارانە
ئەو شا و شالیار شۆڕەسوارانە
کۆن بەزم و دەزگای پاشاکانی جاف
کۆن تەپڵ و سوپا، کۆن لاف و گەزاف
وەکۆ شین دەستەی ئەمیرزادەکان
کۆن باز و شکار کۆن بەگزادەکان
پۆلی گەردەن ساف خانمانی جاف
پەرچەم پەشێوان گشت موشکین کڵاف
سیاماڵ نۆشین شۆخی فەرەنگی
چەمان یاوە جەنگ چون بازی جەنگی
تەن وە شەوش و ڕەنگ کڵاو زێڕەوە
دیدە وە نیگای شۆڕشگێڕەوە
باڵا نومایان وە ئاڵا و واڵا
ماچای زەڕبەفتەن سەر تا پای باڵا
شین وە کام لای ئەو نازارانە
ئەو تلمیت بار و شوڕەسوارانە
واچە کێ جاگیر ئەو شێرانە
کێ مەنەن نە جای ئەو دلێرانە
هەر چی گێژ مەدۆم وە هەواڵەوە
کەس نادا باسی جە پشت ماڵەوە