mîrim ḧisên beg terfeney şaran
çûne ser qełay paşa
Li pirtûka:
Dîwanî Mîne Caf
Berhema:
Mîne Caf (1911-1965)
2 Xulek
373 Dîtin
mîrim ḧisên beg terfeney şaran
wamney cegel şaw şehryaran
cey dem darim kefit we şwên hewarê
ew heware dîm qesir û telarê
xeylê sersam bîm wew hewarewe
wew qesir û qełay şahan warewe
naka dîm kaçê lay ew qełaçe
we naçar keftim ce say ew kaçe
gyan we êş û xem dił we tasewe
dem we tep û dûy serd henasewe
pirsam cew qełay koney wêrane
cew dezgay şahî û cew hewarane
waçe pêm ce kê yadgarenî
cay bezim û şikoy kam serdarenî
ew qeła wey řeng we min dacwar
ahir da we gyan, dił kird we kewaw
wat nişîngey text mîranî cafim
cagey nazaran mişkîn kiłafim
namim meşhûren we qełay paşa
sîrwan seyrangam perêy temaşa
nam nawe pêm cay kam giroye
hewargey kamîn xawen şikoye
we pêm numana şukirî serdaran
bezim û debdebey mîr û nawdaran
ce min kerd me’lûm twîş cew yaranî
yekê ce mîran ew hewaranî
watey min û ew we zwanî cafî
pey to mekyanum min we diłsafî
lakin min ce wêt mepersûm eḧwał
pêm bider xewer gewrey gewre sał
waçe kwê keften ew serdarane
ew şa û şalyar şořeswarane
kon bezim û dezgay paşakanî caf
kon tepił û supa, kon laf û gezaf
weko şîn destey emîrzadekan
kon baz û şikar kon begzadekan
polî gerden saf xanmanî caf
perçem peşêwan gişt muşkîn kiłaf
syamał noşîn şoxî ferengî
çeman yawe ceng çun bazî cengî
ten we şewş û řeng kiław zêřewe
dîde we nîgay şořişgêřewe
bała numayan we ała û wała
maçay zeřbeften ser ta pay bała
şîn we kam lay ew nazarane
ew tilmît bar û şuřeswarane
waçe kê cagîr ew şêrane
kê menen ne cay ew dilêrane
her çî gêj medom we hewałewe
kes nada basî ce pişt małewe