لە تاریخا ئەڵێت بازێ بە بازێ
لە کتێبی:
دیوانی مینە جاف
بەرهەمی:
مینە جاف (1911-1965)
1 خولەک
412 بینین
لە تاریخا ئەڵێت بازێ بە بازێ
وتی تا کەی بژین بێ قەدر و نازێ
هەتا کەی وێڵی سەحرا و دەشت و کێوان
هەتا کەی بێ تەقالای ڕزق و شێوان
وەرە با پێکەوە هەرد و لە گەڵ یەک
بڕۆینە لای ئەمیرێ یا وەزیرێک
لەمل کەین ملبەنی یاقووت و گەوهەر
لەپێ کەین زەنگڵەی ئاڵتوون زیوە
لەسەر تەختێکی زیوین دا بنیشین
بە بێ کۆشش بخۆین و هەم بنۆشین
شەوان هاو مەجلسی سوڵتان و میران
بە ڕۆژا ڕاو بکەین لێل شا و وەزیران
جەوابی دایەوە بازی بڵندخوو
وتی ئەرجوومە ئیتر لێل منا توو
مەکە ئەم نەوعە تەدبیر و بەیانە
لەبەر شانم وەکوو مەرگی گرانە
بە حوڕڕییەت بە هەردە و دارەوە بم
لە برسیانا ئەگەر مردارەوە بم
دەڵێم سەد ساڵ بە تامەزرۆ و بە برسی
بژیم و نەک ببینم ڕۆژی حەپسی
بە سەربەستی هەزار برسی و فەقیر بم
گەلێ لام خۆشترە تێر و ئەسیر بم
بە سەر بەرد و لەناو بەفرا بەبێ باک
بە دەم تیرۆ بغڵتێمۆ لەناو خاک
نە وەک مەحکوومی شاهان و وەزیران
زەلیلی قوشچی و ئەمری ئەمیران