ساقی لەو بادە خومار ئەشکێنێ
لە کتێبی:
دیوانی مینە جاف
بەرهەمی:
مینە جاف (1911-1965)
2 خولەک
546 بینین
ساقی لەو بادە خومار ئەشکێنێ
ڕیشەی وەسواسەی خەم لە بن دێنێ
بمدەرێ جامێ بە یادی جاران
بەڵکو بە نەشئەی دڵ پێکەنێنێ
***
بێ دا بنیشین تاوێ بە دڵی شاد
لە سەر لێوی شەت شارەکەی بەغداد
وەک فیلم یەک یەک بیخەنە پێش چاو
مێژووی ڕابوردوو هەر چی ها لە یاد
***
ئەو شەتەی ساف و ڕەوان ئەڕواتۆ
ئەو مەوجەی بە شەوق لە ڕووت ئەداتۆ
گشت بە سەرهاتی بەغدا ڕا ئەخا
پەروێز و جەمشید ئە بیر ئەخاتۆ
***
دەبدەبەی ڕۆژی شادێکەی شیرین
دەخاتە پێش چاو پیاوی وردبین
دەڵێت ڕۆژی وا نەبوە و نابێتۆ
شیرین بە بووکی هات بۆ مەدائین
***
زۆر باش بڕوانە ئاوی ئەو شەتە
هەر چەندە سافە، بەڵام خەت خەتە
ئەگەر بیزانی بیخوێنیتەوە
ئەزانی دونیا چەن بێ قیمەتە
***
چونکە ئەم جێگە تۆ میوانێتی
ئەم شەتەی کە تۆ لە لیوانێتی
جێگەی هاروونە وا تیادای تۆ
بەزمی مەئموونە لە سەیرانێتی
***
ئای چەن شەهەنشای ساحب سوپا و سان
هاتن و چوون و من هەر مام وەک خۆم
نووسراوە ئەڵێت، کوانێ موعتەسەم
کوا ئالی بەرمەک، کوانێ موعتەسەم
***
هەتا تێفکریت جوان لێی تێ ئەگەی
هەر کەس چۆن تێی هات هەر بەو ڕەنگە ڕۆی
نە هیچیان هێنا نە کەس هیچی برد
شەت و سەیرانگا، خاک ماوە وەک خۆی
***
بەڵام ئەو کەسەی کە بەختیار بوو
لە پووچی دونیا باش خەوەردار بوو
کردەی خاوەنی و جوانی جێ هێڵا
نە کەس ئازاری و نە کەس ئازار بوو