تاقی خانەقای دڵ پڕ وەلوەلەن
لە کتێبی:
ئەو شیعرانەی دراونەتە پاڵ مەولەوی
بەرهەمی:
مەولەوی (1806-1882)
1 خولەک
1101 بینین
تاقی خانەقای دڵ پڕ وەلوەلەن
تاس کەللەی سەر پڕ نە هەلهەلەن
فیکرم نە تەزهیب نەفس و ئیسباتەن
خەیاڵم مەشغووڵ شەرح سیفاتەن
عەکس تەجەللای مەشعەل ڕووی دۆس
شەوق مەدۆ چون شەم نە فانۆس پۆس
توورناوی تایبەت تەن شۆڵەی جەزبەی حەقیقەت
کەردەن وە سورمەی دیدەی مەعریفەت
تا خاس عەقیدەی ئەحواڵ موکحەل بۆ
نەوا قورس نوور ئیخلاسم کەل بۆ
دووبینی ڕای ڕاس وەرنەدەی جە دەس
مەبۆ وە باعیس توغیان هەوەس
یەک ڕەنگی مایەی ڕستگارییەن
ساقی دەی جامێ دەردم کارییەن
دەمێ قەوی کەر زەعیفی تاڵەم
بەڵ دەمێ کەم بۆ ناڵەم جە ئاڵەم