سەعید و مەسعوود بە لەشکرەوە ڕێ لە شازادە دەگرن
لە کتێبی:
سوڵتان ئیبراهیم و نۆشافەرین
بەرهەمی:
خانای قوبادی (1704-1778)
2 خولەک
454 بینین
بشین وە سەروەخت مەغریب زەمین
پەی نۆش ئافەرین دایم دڵ غەمگین
ناگا قاسێدان خەبەر ئاوەردن
شازادە جەی کار سەر حەساب کەردن
ئارۆ شازادە و شای نۆش ئافەرین
وارێد بین بە زەید شای مەغریب زەمین
شازادان نەی کار ببین خەبەردار
تەڵەب کەردشان بیست هەزار سوار
بیست هەزار سوار نەشار شین وە بەر
گرتن سەرەڕای ئەو ڕاگەی گوزەر
هەم دیسان قاسێد ئاوەردن خەبەر
واتن خان محەمەد ڕەشید سەروەر
سەعید و مەسعوود چەنی چل هەزار
هاوەختەن بەیۆن بەی ماواو دیار
شای نۆش ئافەرین بەزۆر ببەران
شازادەی خوونخوار بێ سەر بکەران
خان محەمەد شنەفت خرۆشا بەقار
ناگا دیاردا چل هەزار سەوار
چل عەلەم نەدوور دەردەم دا دیار
یەعنی نیشانەی چل هەزار سوار
شازادە مەسعوود کومێت سوارەن
پەی نۆش ئافەرین نەدین بێزارەن
شازادە مەسعوود غوڕانە و سپا
واتش ئیبراهیم هەرزەی بێ حەیا
نادانان پاسە لێش مەبۆ نیشان
جەفای وەی تەورە بێهوودە کێشان
مەر شار دەمشق نە یادت شییەن
نەزانای مەغرێب بێ ساحێب نییەن
شای نۆش ئافەرین تۆ بدەر بەدەست
تاواچووم سپا تۆ نەکەرۆ قەست
خان محەمەد شنەفت ئاما بە گوفتار
واتش ئەی لەعین شووم نابێکار
قابل نەداری نە عەرسەی مەیدان
نام شازادە باری بە زبان