پاڕانەوەی شازادە و نۆش ئافەرین لە دەرگای خوای گەورە
لە کتێبی:
سوڵتان ئیبراهیم و نۆشافەرین
بەرهەمی:
خانای قوبادی (1704-1778)
3 خولەک
612 بینین
* ئەوەند کەردشان زاری فەراوان
لاڵان نە دەرگای ڕەحیم و ڕەحمان
واتن یاکەریم کەرم بنمانە
دەلیلی بە خەیر پەیمان بکیانە
جەو تەرەف دیسان خاتوونەی نازدار
جە حاڵ شازادە ببی خەبەردار
خاتوون جە بابۆش هیمەتخواهی کەرد
فەرما بە فەرهەنگ تەخت زەڕ ئاوەرد
دەرلا سوار بی وە فەرهەنگ دێو
لوا بەراوە ماتەم و پەشێو
تا یاوا بە جای سەحرای ناهەموار
شازادە و نازدار جە دوور دا دیار
هەردوو بێ هۆشەن کەفتەن نە ڕووی خاک
مەیموونە خاتوون یەقە کەردش چاک
دیش نۆش ئافەرین کەفتەن وە غەمگین
جواناو جەم بەستەن نە جام جەمین
سەر نۆش ئافەرین نیا نە ئاغۆش
وێنەی دەستە گوڵ بۆ نیا نەبۆش
شای عەبدورەحمان وارێد بی بەو جا
بەڕووی شازادە خەیلێ کەرد نیگا
فەرما کە دەردەم گوڵاب ئاوەردن
گۆنای هەردووشان گوڵابرێز کەردن
هەر چەند سەعی کەرد کە نامان بەهۆش
مەیموونە خاتوون ماهـ قەسەب پۆش
عەرز بابۆش کەرد ئەو شۆخ نازار
هەردووشان مەبەم بەو باغ و گوڵزار
دەردەم فەرمان دا دوو تەخت ئاوەردن
شازادە و نازار سوارش کەردن
ڕوو کەردن بە ڕا یاوان بە گوڵزار
فەرما ئاوەردن گوڵان بە خەروار
موهری سولەیمان دەردەم ئاوەردن
دەوای بێ هۆشیی شازادە کەردن
هەردووشان نەخەو دیدە کەردن باز
دین عەبدورەحمان نیشتەن بە دڵواز
مەیموونە خاتوون سەلام کەرد لێشان
هەر دوو ئەو سەلام عەلەیک سەندشان
واتشان ئێمە چون یاوان بە ئەی جا
جەی کارو کردار من بکەن ئاگا
مەیموونە خاتوون گوزەشتەی ئەی کار
یاونا بە عەرز جە لای شەهریار
یەک پەری ئاما جە ئادەمیزاد
جە دوور کە ئاما دەست کەرد بە فەریاد
واتش جە سەحرای توور دیم دوو سوار
هەردوو بێ هۆشەن نەوسەحرای دشوار
من زانام سەوار نۆش ئافەرینەن
ڕەفیقش سوڵتان شازادەی چینەن
تو واچە پەی من نام و نیشانت
جە کۆن خان محەمەد ڕەفیق گیانت
تەمام گوزارش حاڵات بەیان کەرد
پەرێ خان محەمەد کێشا ئاهـ سەرد
عەبدورەحمان شا فەرهەنگ کەرد تەڵەب
وات مەبۆ بشی تا شار حەڵەب
بشین بە سەر وەقت باقیی داستان
ئەو شەو خان محەمەد شێر سەربۆستان
شمشێر بوڕان نەفەرقش جا کەرد
ولحاسڵ تاتاق ئەبروش جیا کەرد
* خوون نەڕووی جەمین خان ماڵاماڵ بی
ئەوەند خوون ئاما خەیلێ بەدحاڵ بی
ئەسپش ڕانا یەک شەب و یەک ڕۆ
تا شی بە باغ پڕ گوڵ پڕ شکۆ