pařanewey şazade û noş aferîn le dergay xway gewre
From the Book:
Suɫtan Îbrahîm û Noşaferîn
By:
Khana Qubadi (1704-1778)
3 minutes
613 views
* ewend kerdişan zarî ferawan
lałan ne dergay řeḧîm û řeḧman
watin yakerîm kerim binmane
delîlî be xeyr peyman bikyane
cew teref dîsan xatûney nazdar
ce ḧał şazade bibî xeberdar
xatûn ce baboş hîmetxiwahî kerd
ferma be ferheng text zeř awerd
derla swar bî we ferheng dêw
lwa berawe matem û peşêw
ta yawa be cay seḧray nahemwar
şazade û nazdar ce dûr da dyar
herdû bê hoşen keften ne řûy xak
meymûne xatûn yeqe kerdiş çak
dîş noş aferîn keften we ẍemgîn
cwanaw cem besten ne cam cemîn
ser noş aferîn nya ne aẍoş
wêney deste guł bo nya neboş
şay ’ebdureḧman warêd bî bew ca
beřûy şazade xeylê kerd nîga
ferma ke derdem gułab awerdin
gonay herdûşan gułabrêz kerdin
her çend se’î kerd ke naman behoş
meymûne xatûn mah qeseb poş
’erz baboş kerd ew şox nazar
herdûşan mebem bew baẍ û gułzar
derdem ferman da dû text awerdin
şazade û nazar swarş kerdin
řû kerdin be řa yawan be gułzar
ferma awerdin gułan be xerwar
muhrî suleyman derdem awerdin
deway bê hoşîy şazade kerdin
herdûşan nexew dîde kerdin baz
dîn ’ebdureḧman nîşten be diłwaz
meymûne xatûn selam kerd lêşan
her dû ew selam ’eleyk sendişan
watşan ême çun yawan be ey ca
cey karu kirdar min biken aga
meymûne xatûn guzeştey ey kar
yawna be ’erz ce lay şehryar
yek perî ama ce ademîzad
ce dûr ke ama dest kerd be feryad
watiş ce seḧray tûr dîm dû swar
herdû bê hoşen newseḧray dişwar
min zanam sewar noş aferînen
řefîqiş sułtan şazadey çînen
tu waçe pey min nam û nîşanit
ce kon xan miḧemed řefîq gyanit
temam guzarş ḧałat beyan kerd
perê xan miḧemed kêşa ah serd
’ebdureḧman şa ferheng kerd tełeb
wat mebo bişî ta şar ḧełeb
bişîn be ser weqit baqîy dastan
ew şew xan miḧemed şêr serbostan
şimşêr buřan neferqiş ca kerd
wilḧasił tataq ebruş cya kerd
* xûn neřûy cemîn xan małamał bî
ewend xûn ama xeylê bedḧał bî
espiş řana yek şeb û yek řo
ta şî be baẍ piř guł piř şiko