hatnî mahî zeř’efşan kiçî paşay entakye bo baẍ û dîtnî xan miḧemed
From the Book:
Suɫtan Îbrahîm û Noşaferîn
By:
Khana Qubadi (1704-1778)
7 minutes
679 views
mah zeř’efşan teşrîf awerdiş
seyrangay řûy baẍ bedił awerdiş
wextê ke yawa bederwazey baẍ
dîş ke cwanê wêney şewçiraẍ
keften we bê hoş nerûy text xak
behûn serzemîn kerdenş nemnak
nîşaney ełmas berg etłes poş
kemerbend teła xerqey lał nedoş
gonaş medrewşo we şehryarî
řengînen behûn gonay gułnarî
nîşaney şahî weneş dyaren
we tac û nîm tac ew şehryaren
derlad giriftar bejin bałaş bî
giriftar be şewq řeng ałaş bî
pyade bî lwa şî ne serînş
řanş danya nejêr serînş
xedeme û kenîz derlad tełeb kerd
xan miḧemed we naw gułzar baẍ berd
derlad ferman da aftabe berdin
zexim şazade hûnş pak kerdin
dest berd qutûy merhem ber’awerd
zexim xan miḧemed merhem řêziş kerd
nya netoy řext zeřtan ała
xawiş berdewe ew netoy wała
wextê nîme şew dîde kerdiş baz
dîş ha ne qesir şîrîn bedłiwaz
mah zeř’efşan ha ne bałînş
guław meşano ne řûy cemînş
çun tawis mest şewq medo be naz
řoḧ nederûnda mekerd weperwaz
derlad giriftar bejin bałaş bî
giriftar beşewq xał ałaş bî
mah zeř’efşan kerdiş diłdarî
xan miḧemed farêẍ ne girye û zarî
dem ne řûy qilyan leb beřazewe
betoy ’ereqçîn yeqe wazewe
mah zeř’efşan ama be guftar
watiş xan miḧemed şêr beçey zordar
řast waçe be min ce kam wiłatî
ademîzadî kam serbîsatî
ye beko meşî ’ezim ko darî
kê kerden ceto ey zexim karî
xan miḧemed watiş ey gyan şîrîn
min xidmetkarim be noş aferîn
aẍay min sułtan şazadey çînen
ewîş sergerdan noş aferînen
eweł ta axir perêş beyan kerd
nazar êd şineft kêşa ah serd
mah zeř’efşan şineft ey xeber
derlad horêza şî belay pêder
giftey xan miḧemed ḧałat seranser
yekser yawna be’erz pêder
xusrew şa şineft wat ḧorî leqa
ew cewan perêm bawere bey ca
mah zeř’efşan horêza we pa
ama be gułzar be ferman şa
watiş xan miḧemed babşîn berah
tełebkarten xusrew padşah
xan miḧemed şineft derûnş êşa
xeylê zarî kerd ah serd kêşa
nazar êdiş dî derlad lêş persa
pey çêş zarîten şîn û waweyla
xan miḧemed watiş řazim seranser
’erz kerdim penet neřencot xatir
bełê qisey min dûren dirazen
dad nedest çerx fire keçbazen
řefîqim sułtan saḧêb qiranen
ber hem zenendey neřeşêranen
telîsim gûya cezîrey waq waq
kax suleyman ce bîm kerdiş saq
* ’elqem û zelẍem her dû kerd helak
zengułey dişwar ce bîm kerdiş pak
meymûne xatûn hem noş aferîn
necat da ce bend ’elqem bê dîn
baciş ne şahan ’ałem gişt senden
şahan dunya celaş çun benden
îse mezano ce kon mawaşan
şad bûn hem dîsan wexak paşan
mah zeř’efşan şineftiş begoş
ah serd kêşa demê bî bê hoş
çun ama be hoş ama be guftar
min ke firêm hen leşkir bê şumar
ba bişîn serwext xusrew şay sanî
tełeb keyn leşkir herçê mezanî
min be hemřay to řahî bîn ce řah
bişîn ta be mułk behmen padşah
înşeła şerit bo xak ew dyar
be turbe kêşim mawerûm be şar
min be dest wêm ḧeqit bistanûm
behmen be qesir duzex bikyanûm
êd wat herdûşan řûnyan berah
yawan be xidmet xusrew padşah
ta yawan bargey seray padşa
derlad ne espan herdû bîn pya
xan miḧemed çenî mah zeř’efşan
herdû çenî hem lwan be dîwan
te’zîm kerdişan ne řûy padşa
şa derdem îd dî horêza we pa
xeylê ’izet gird şay wała tebar
watiş xan miḧemed xeberder nekar
tayfey kênî ’ezim ko darî
pey çêş bey destûr zaruzgarî
xan miḧemed şineft kêşa ah serd
senay xusrew şa ferawanş kerd
eweł ta axir guzeştey kirdar
yawna be’erz celay şehryar
xusrew şa şineft guzeştey ey kar
xeylê perêşan girewa be zar
wat xan miḧemed min û ’adił şa
ne řay kurdistan her dû be hemrah
ne ew seferda ’adił şay piř zûr
zor kerd ce pider behmen bednûr
îse to maçî behmen piř zoren
meger ’adił şa ucaxiş koren
êd wat ferman da cařkêşan be şar
leşkir swar bî çil hezar swar
çil hezar swar be ew siperdiş
mah zeř’efşan merexes kerdiş
xan miḧemed řuxset ce şa tełeb kerd
řewaney řa bî řû ne ḧełeb kerd
yełẍar kerdişan şeb û řoj nekerd
ta şî be ḧełeb şêr řûy neberd
beydaẍ sifîd cengî kerd we pa
cem bî nedewirş çil hezar sipa
derdem qasêdan xeber awerdin
behmen cey kare ser ḧesab kerdin
behmen êd şineft pa da ne řîkab
sî hezar swar swar bîn be tab
ne şar ḧełeb řewaney řa bî
ta daxił be deşt san û sipa bî
watiş xan miḧemed şûm nabêkar
pey çêş şazade hîç nîyen dyar
watiş ey behmen pelîd murdar
řûker ne meydan ’ersey karzar
îse be tofîq dehendey dawer
ne řûy ’ersegah çêş barût beser
behmen çun şineft řûkerd ne meydan
nała û nirkina çun şêr ẍuřan
şimşêrş kêşa berdiş be hewa
xan miḧemed esper kêşa beserda
weqtê da ne řûy qubegay esper
qubey esperş bî burc exzer
xan miḧemed kemend hewa da be qar
şazade behmen awerdiş bewar
ferma be ẍułam dest bestiş kerdin
we keşan keşan be xeyme berdin
qaw kefit ne quşûn behmen şa gîrya
sipay şa behmen derdem gurêza
mah zeř’efşan hicûmê berdiş
xeylê cew sipa wegîr awerdiş
we fetiḧ û nusret bekam diłxiwa
gêłanewe pes pey xeyme sera
naga peyda bî destê ne hewa
xan miḧemed hordaşt berdiş we bała
ferheng dêw bî ama we guftar
wat eto berdim şazadey salar
watiş ey ferheng to danay dawer
min baze wey ca to xeber biber
ferheng dêw şineft řû kerd we dima
yawa be xidmet şêr sef pena
watiş şa zade bider mizganî
behmen şa girten nebo nehanî
guftey xan miḧemed guzarş temam
yawna be sem’ şay wala meqam
şazade şineft xeylê bî xoşḧał
watiş padşa xuda nîge hidar
îse xan miḧemed dîdeş neřamen
şeb û řoj daym her we temamen
ferma ferheng dêw perêş awerdin
bedest şazadey dilêr siperdin
şay noş aferîn şazadey salar
derdem herdûşan be dêw bîn swar
bişîn we serwext xan miḧemed şêr
ew řo cengiş kerd bewr deng dilêr
řû kerd necanêb mah zeř’efşan
hawexten beyo şazadey ’eyan
êd wat û derdem hicûm awerdin
řû neqel’ey text behmen şa kerdin
sipay behmen şa ḧesarî kerdin
derwazey qel’e hem muḧkem kerdin
xan miḧemed çun şêr hîç bak nekerdiş
derwazey qel’e be dest awerdiş
ferma ke tîşew teber awerdin
derwazey qeła gişt pare kerdin
şî be enderûn şar dagîr kerdiş
fermandey behmen we pêş awerdiş
ẍuřa ne celad bikêşin bedar
tîr baran biken behmen murdar