geyştinî şazade be şarî ḧełeb û řizgarkirdinî behmen şa
From the Book:
Suɫtan Îbrahîm û Noşaferîn
By:
Khana Qubadi (1704-1778)
2 minutes
388 views
newdem şazade warêd bî ne cah
ce dûr û nezdîk her mekerd nîgah
naga peyda bî meymûne xatûn
ewîş ke ama we bê çend û çûn
watiş xan miḧemed hem sipa salar
bibexşe bemin behmen murdar
xan miḧemed ejnî şazade ama
derdem der sa’et horêza we pa
kefit ne xak pay şazadey zordar
selam dawe nezd şêr beçey xûnxiwar
xan miḧemed derdem ’eleyk da weneş
řewyey şahane beca awerdiş
şazade watiş ey xan miḧemed
nîgedarit bo padşay semed
sed barekeła ey fetḧe kerdî
behmen û qełaş bedest awerdî
meymûne xatûn ferma hem nedar
awerdin be xwar behmen salar
melîk behmen sucdey şazade berdiş
adab erkan beca awerdiş
xatûn şî belay şay noş aferîn
sucdey zemîn berd be’îz û temkîn
şay noş aferîn ’eleyk send benaz
şîn benaw ḧerem herdû bedłiwaz
mah zeř’efşan paydar kerdiş
qa’îdey şahan beca awerdiş
meymûne xatûn hem noş aferîn
şîn benaw ḧerem be’îz û temkîn
mah zeř’efşan horêza we pa
selam kerd benaz şay ḧorî leqa
şay noş aferîn ’eleyk send benaz
dest kerd ne gerden şay şekerîn řaz
xatûn ke bersa ey ḧorî leqa
kinaçê kênî ey xurşîd sîma
wat min kinaçey xusrewşay şêrim
ne řoj de’wa xeylê dilêrim
meymûne xatûn şah perîyan
dest kerd negerdin mah zeř’efşan
şay noş aferîn tewazu’ kerdiş
řewyey şahane be ca awerdiş
şazadey bê bak bewr bî endêş
behmen tełeb kerd xel’et bexşa pêş
be’d şazade ferma koç kerdin
řû be welayet şar xeta kerdin