پەیدابوونی ئەفراسیاو و شەڕکردنی لەگەڵ نۆش ئافەریندا
لە کتێبی:
سوڵتان ئیبراهیم و نۆشافەرین
بەرهەمی:
خانای قوبادی (1704-1778)
4 خولەک
804 بینین
گۆش دەن بە داستان زەمانەی وەرین
وەی تەور کەرد بەیان جە نۆش ئافەرین
دارووغەی بازاڕ چەنی چل نەفەر
پەیدا بین گرتن گوزەرگای گوزەر
ئەفراسیاو دیش شەخسێ سیاپۆش
بارێ چون جەواڵ گرتە بێ بە دۆش
مەیۆ بە ڕاوە جەڵد و چابک خێز
بەشێتاب چون باد مەکەرۆ گورێز
غوڕا وات ئەی شەخس نەی زوڵمات تار
نە ئەهل شاری یا جە نابێکار
ئەی بارە چێشەن نەپشت کەردەنت
جە خەزانەی کێ تۆ ئاوەردەنت
سەروی سیم ئەندام یار وەفادار
ئەسڵا نەو جەواب ناما بە گوفتار
جە تەشویشیی خەزانەی دۆشش
واچی ئەو ئاواز ناما بە گۆشش
دارۆغە ئێد دی ستێزا بە قین
بەقار حەمڵە بەرد پەی نۆش ئافەرین
دڵبەر وێنەی شێر زەنەندەی خەتەر
دامان مەردیش دا نە ڕووی کەمەر
دەست پێکا وەتێغ هوون بەرەندە ڕێز
بەوێنەی پڵەنگ نەجا کەرد ئاخێز
ئەفراسیاب دیش زەلزەلەی شوورش
هیمەت دا وەقین وەبازووی زوورش
ناعیلاج ڕووکەرد نەعەرسەی خەتەر
ئاما بە مەیدان سەرو نازپەروەر
ئەفراسیاو وات ئەی بەدەن سیا
پەی چێش مەگێڵی کووچە و گوزەرگا
ئەی کۆڵە چێشەن نەی شەب دەیجوور
گرتەنت نەدۆش چون دوزدان دەستوور
نۆش ئافەرین وات خوون جەرگ تۆن
قابز ئەرواح مەوت مەرگ تۆن
نەعرەتە پێکا شێر دوڕ شناس
وات جە دەست من نمەبۆت خەلاس
دەست بەرد پەی قەبزەی شمشێر پڕ بیم
داش نەموهرەی پشت، کەردش بە دوو نیم
غەڵتان بی نەخاک کەفت نەگوزەرگا
دەرسات نە ئەوجا گیانش بی تەبا
باقیی غوڵامان خاتر پەرێشان
گورێزان تا شین بە ماوای وێشان
بەتاو تەعجیل شۆخ خاتر تەڕ
شا گرت نەرووی دۆش شی بە قەسر زەڕ
نیگای بامش کەرد شۆخ شەیدای شەنگ
دیش کەسەروناز نیشتەن وە بێ دەنگ
وات ئەی نازەنین شیرین کەنێز
تای کەمەند پەرێم کەرە سەر ئاوێز
سەروناز بە حەرف شای نۆش ئافەرین
حەڵقەی تای کەمەند وستش نە پاین
ئەوەڵ شازادە شێر هونەرمەند
پێچا بە تەناف سەرحەڵقەی کەمەند
هەم جەنەو کەمەند کیاست وە پایین
نیشت نەتای کەمەند لەیل نازەنین
بە وێنەی تەڕلان شۆخ جەمین جام
دەست دا بە تەناف تایاوا وە بام
سەروناز واتش ئەی کۆڵە چێشەن
پەنەم واچە ڕاست کێ نە دلێشەن
وات هەنگامەی وەخت گفتوگۆ نییەن
بشین بە سەرا مەزانی کییەن
هۆر گرتن بەردن وەقەسر زەڕکار
نیاشان وە بان کورسیی زەڕنگار
دارووی بی هۆشی دا نە دەماغش
ئاماوە بە هۆش نەزەوق باغش
دیدە گوشاد کەرد شازادەی چینی
دیش نۆش ئافەرین بەو نازەنینی
نیشتەن نەسەرین شازادەی دڵرێش
بۆی عەتر و عەنبەر گوڵاو مەیۆ لێش
بۆی عەتر و عەنبەر گوڵاو مەبێزا
بۆی موشک تاتار ماما نە ئەو جا
چون شەمع فانۆس هانە سەرینش
ئەسرین مەرێزۆ نەرووی جەمینش
سەروناز بە ناز شۆخ خاتر تەر
مەنۆشا گوڵاب هەم عەتر و عەنبەر
دیش نۆش ئافەرین نیشتەن بە غەمناک
مەڕێزۆ هووناو نەدیدەی نمناک
واتش فیدات بام نازدار دڵکێش
ئەی ئاشۆفتەگی و زاری یانی چێش
ڕۆحم فیدات بۆ نەونەمام نۆ
ئەمن جە کۆ بیم ئیستە هام جە کۆ
ئەمن چون وارێد بیم نە خاک تۆ
وێنەی بێ هۆشان هیچ نمەزانۆ
شیرین حاڵ خەبەر سەرگوزەشتەی وێش
جە سەر تا بە وار تەمام وانا پێش
جە وەزیر کوشتن تا ئەفراسیاب
جەگشت بابەتێ کەردش سەرحەساب
شازادە واتش شای وەفا پێشە
هەنی ئەی کارە نەکەی وە پێشە
نیشتن هەمزانوو نەوی دلێشان
تا نەزدیک سوب بەکام وێشان
نەزدیک سوب بی شازادەی چالاک
هۆرێزا چابوک چون شێر بێ باک
جە نۆش ئافەرین هیمەت خواهی کەرد
قەدەم بە مەنزڵ مەکان وێش بەرد
دیش یاران هێما خەفتەن نەرووی خاک
کەفتەن وەبێ هۆش ماتەم و خەمناک
تۆ واچی فەڵەک بەستەن باڵشان
کەس موخبیر نییەن جە ئەحواڵشان
شازادە دەواش نەجیب بەرئاوەرد
دەفع بێهۆشیی ڕەفیقانش کەرد
هەرچێ گوزارش جە بەین گوزەشتەن
قسەی جەنگ و شۆر تا وەزیر کوشتەن
چابوک مەردیی شای نۆش ئافەرین
عەیان کەرد پەیشان بە ڕاز شیرین
وەختێ شنەفتن چون گوڵ بکاوان
واچی مەردەبین جە حەیات یاوان
شوکرانەی بێ حەد یەزدان کەردشان
سوجدەی ئیلتیفات داوەر بەردشان