peydabûnî efrasyaw û şeřkirdinî legeł noş aferînda
Li pirtûka:
Suɫtan Îbrahîm û Noşaferîn
Berhema:
Xanayê Qubadî (1704-1778)
4 Xulek
558 Dîtin
goş den be dastan zemaney werîn
wey tewr kerd beyan ce noş aferîn
darûẍey bazař çenî çil nefer
peyda bîn girtin guzergay guzer
efrasyaw dîş şexsê syapoş
barê çun cewał girte bê be doş
meyo be řawe cełd û çabik xêz
beşêtab çun bad mekero gurêz
ẍuřa wat ey şexis ney zułmat tar
ne ehil şarî ya ce nabêkar
ey bare çêşen nepişt kerdenit
ce xezaney kê to awerdenit
serwî sîm endam yar wefadar
esła new cewab nama be guftar
ce teşwîşîy xezaney doşiş
waçî ew awaz nama be goşiş
daroẍe êd dî sitêza be qîn
beqar ḧemłe berd pey noş aferîn
diłber wêney şêr zenendey xeter
daman merdîş da ne řûy kemer
dest pêka wetêẍ hûn berende řêz
bewêney piłeng neca kerd axêz
efrasyab dîş zelzeley şûrş
hîmet da weqîn webazûy zûrş
na’îlac řûkerd ne’ersey xeter
ama be meydan seru nazperwer
efrasyaw wat ey beden sya
pey çêş megêłî kûçe û guzerga
ey kołe çêşen ney şeb deycûr
girtenit nedoş çun duzdan destûr
noş aferîn wat xûn cerg ton
qabiz erwaḧ mewt merg ton
ne’rete pêka şêr duř şinas
wat ce dest min nimebot xelas
dest berd pey qebzey şimşêr piř bîm
daş nemuhrey pişt, kerdiş be dû nîm
ẍełtan bî nexak kefit neguzerga
dersat ne ewca gyanş bî teba
baqîy ẍułaman xatir perêşan
gurêzan ta şîn be maway wêşan
betaw te’cîl şox xatir teř
şa girt nerûy doş şî be qesir zeř
nîgay bamş kerd şox şeyday şeng
dîş keserunaz nîşten we bê deng
wat ey nazenîn şîrîn kenêz
tay kemend perêm kere ser awêz
serunaz be ḧerf şay noş aferîn
ḧełqey tay kemend wistiş ne payn
eweł şazade şêr hunermend
pêça be tenaf serḧełqey kemend
hem cenew kemend kyast we payîn
nîşt netay kemend leyl nazenîn
be wêney teřlan şox cemîn cam
dest da be tenaf tayawa we bam
serunaz watiş ey kołe çêşen
penem waçe řast kê ne dilêşen
wat hengamey wext giftugo nîyen
bişîn be sera mezanî kîyen
hor girtin berdin weqesir zeřkar
nyaşan we ban kursîy zeřingar
darûy bî hoşî da ne demaẍiş
amawe be hoş nezewq baẍiş
dîde guşad kerd şazadey çînî
dîş noş aferîn bew nazenînî
nîşten neserîn şazadey diłrêş
boy ’etir û ’enber guław meyo lêş
boy ’etir û ’enber guław mebêza
boy muşk tatar mama ne ew ca
çun şem’ fanos hane serînş
esrîn merêzo nerûy cemînş
serunaz be naz şox xatir ter
menoşa gułab hem ’etir û ’enber
dîş noş aferîn nîşten be ẍemnak
meřêzo hûnaw nedîdey nimnak
watiş fîdat bam nazdar diłkêş
ey aşoftegî û zarî yanî çêş
řoḧim fîdat bo newnemam no
emin ce ko bîm îste ham ce ko
emin çun warêd bîm ne xak to
wêney bê hoşan hîç nimezano
şîrîn ḧał xeber serguzeştey wêş
ce ser ta be war temam wana pêş
ce wezîr kuştin ta efrasyab
cegişt babetê kerdiş serḧesab
şazade watiş şay wefa pêşe
henî ey kare nekey we pêşe
nîştin hemzanû newî dilêşan
ta nezdîk sub bekam wêşan
nezdîk sub bî şazadey çalak
horêza çabuk çun şêr bê bak
ce noş aferîn hîmet xwahî kerd
qedem be menził mekan wêş berd
dîş yaran hêma xeften nerûy xak
keften webê hoş matem û xemnak
to waçî fełek besten bałşan
kes muxbîr nîyen ce eḧwałşan
şazade dewaş necîb ber’awerd
defi’ bêhoşîy řefîqanş kerd
herçê guzarş ce beyn guzeşten
qisey ceng û şor ta wezîr kuşten
çabuk merdîy şay noş aferîn
’eyan kerd peyşan be řaz şîrîn
wextê şineftin çun guł bikawan
waçî merdebîn ce ḧeyat yawan
şukiraney bê ḧed yezdan kerdişan
sucdey îltîfat dawer berdişan