دیسان وەڵامی خانا بۆ میرزا شەفێع میرزام خوارییەن
لە کتێبی:
دیوانی خانای قوبادی
بەرهەمی:
خانای قوبادی (1704-1778)
2 خولەک
708 بینین
میرزام خوارییەن، میرزام خوارییەن
ئاخر سەرمایەی پیری خوارییەن
پێشەش ئاهی سەرد شین و زارییەن
مایەی بێقەدری و کەفتەکارییەن
سەرمایەی سەودای بازاڕ پیری
هەر ئاخ و داخەن، ئەندۆ و زویری
هێما تۆ خاسی بەحر مەعانی
قەدری عافییەت ئەوسا مەزانی
عەسایەت وە دەس دوولا دوولات بۆ
نە زۆر زانوو، نە هاز پات بۆ
جە ناتەوانی، جە کۆری و چەفتی
تۆفڵان قاوکەران: خاڵۆ ها کەفتی!
مەرگت هەراسان نیزامیی سانی!
وەخت چاشت و نان وە بێ دندانی
عارەقت بەیۆ وە چرچ ڕوودا
چەناکەت بدۆ وە پشت کەپوودا
لەززەت دەوران، حەرام مەبۆ لێت
دۆست و بێگانە عیبرەت کەرۆ پێت
بێ قەدر و قیمەت وە بێ حاڵ کەفی
نەجای باش لە حاف وە گاجڵ خەفی
ڕیپۆقت بەیۆ وە هێر دوو چاودا
هەردوو پات بشۆ وە چڵ چەپاودا
وەختێ هۆرێزی بشی وە ڕاوە
جنگۆڵت گێڕان گشت جە دماوە
هەر کەسێ بەیۆ پێتا بماڵۆ
قوللـەی مناڵان های مەچۆ خاڵۆ
پیرە کەیوانۆ، لێت کەرۆ حاشا
ئەوسا مەبۆ سەیر قوللـە و تەماشا
هەر کەس فامدارەن چون تۆ مەزانی
مەردەی خاستەرەن جەی زیندەگانی
بەڵام خاس دۆعام مەردەن جە ئەییام
مەخسووسەن ئەرباب عاری و کەم فام
هیچ نمەزانان قەدری جەوانی
بە دەرد پیری، تا نەبۆن فانی
هەرچی مەرەز هەن، جەم بۆ جەی دنیا
حەکیمان ناویان وە پیری نیا
میرزای وەش کەلام، هام دەرد دەردم
شەممەی جە پیری ها بەیان کەردم
شەفیع زیقەدر مستەوفی دیوان!
شیعرای شیرین ڕاز، جە قەسر ئەیوان
جەوانی لوان، ئامانش نییەن
پیری دەردێوەن دەرمانش نییەن
پەی میرزا شەفیعکەس برای خۆشکەلام
خاناناسناوی ئەدەبی پەرێش وات: باقی وەسسەلام