مەریوان
لە کتێبی:
دیوانی حەقیقی
بەرهەمی:
حەقیقی (1902-1996)
2 خولەک
520 بینین
ئەو ساڵەی وا ئاڕمسترانگ
سواری سەفینەی بوو چۆ مانگ
بە هۆی تلسکۆپی قەوی
سرنجی دا کورەی زەوی
سەفینەی دی وەک سەییارە
لە نێو دەریاچێکی دیارە
لە بەر حیرەت کەللەی ماسی
باڵندەی لێ ببوە ماسی
مانگیش دەتگوت بووکی ئاوە
ئاوێنەی بۆ ڕاگیراوە
شاباشی نوقرەی ئەستێرەن
ئەستێرەی عاسمانێ لێرەن
حاسڵ سەرسوڕمانی هێنا
بە یەزدان ئیمانی هێنا
ڕاما و داما داخۆ کوێ بێ؟
ناکا سەییارێکی نوێ بێ؟
جێ بەحرە و دەدرەوشێ ماسە؟!
یا کانگەی دوڕڕ و ئەڵماسە؟!
دەستی مووسا و کێوی توورە؟!
یا مەستوورەی دەریای نوورە؟!
عەرزە و لای ڕۆژئاوا بوونە؟!
یا بەرگەردانی گەردوونە؟!
سەر لێ شێواو بوو ئەندێشە
«کامپیۆتر» سەرنج ڕاکێشە
بە وەرگێڕانی ئەژمارە
بڕیاری دا زرێبارەشوێن
دەریای مێژووی مەریوانە
شاری ژوورووی کوردستانە
بە گوێرەی چیرۆکی کۆنە
جێ شاری دەروێشی خۆنە
حاشا بە غەدر و ئاهۆ چوو
زانستی سەنگین بو ڕۆچوو
میغناتیسی کەشتی جەوی
تەنیا لە حاندی وی نەوی
مرۆیان بڕوایان وایە
«مریوان» «واو» ی پێش «یا» یە
گشتی ژیر و دانشمەندن
نائەژمێررێ بێژی چەندن