بووکی شاران
لە کتێبی:
دیوانی حەقیقی
بەرهەمی:
حەقیقی (1902-1996)
2 خولەک
659 بینین
بووکی شارانە شاری بۆکانێ
کانی زێڕینە گەوهەری کانێ
دیمەنە، چیمەنە، چەمە، باغە
خوار سەقز ڕۆژهەڵاتی سابڵاغە
سەددی زێڕینە ڕوودەلای شەرقی
بۆ شیمال ڕووکە میاندوا و بەرقی
لە هەوەڵیان مەلەی بکە بە دوێ
لەوی تریان بە ئازەری بدوێ
دەور و پشتی کەل و تەپە و دەشتە
دڵگر و دڵڕفێن و جێ گەشتە
جۆیە، جۆبارە، کانییە، ئاوە
وەک بەهشتی دەچێ لەگش لاوە
حەوزەکەی چەشنی حەوزی باغی ئێرەم
نە بە دیناری ساز بووە و نە درەم
شانەهەنگوینە ئاوەکەی بە خەواس
پوورە پەروینی ها تیا ڕەققاس
دوڕڕ و ئەڵماسە خیزەکەی تەختی
گەوهەر ئەفشانە بەو دڵی سەختی
یەک دوو مستان وەخۆ و بڵێ ئۆخەی
«ومن الما كل شئ حيعەرەبی»
ئەو قەڵا بەرزە کاخی سەردارە
سەربەرز لەو دیارە ئەو دیارە
چوارەکان ڕووحی هەر چوار و شاد
چواریار یارو بێ و عەداڵەت و داد
لێو ببوورێ خودا هەزاران جار
هەڵبژاردن وەها دەبێ جێ شار
چۆمی سیمینە ڕوودی پێدا دێ
ئەم بەری شارە ئەو بەری لادێ
وەک موسەللایە باغی میراوا
هەر بخۆ میوە بێژە ماڵاوا
ئاوی چاوان وەخۆنە ڕوکناباد
کلی چاوانە خاکی عەلیاباد
شاری بۆکانە جێی ئەدیبانە
شاری میوانگر و غەریبانە
کێ دەبینی لە شار و ئەتڕافی
لە کەماڵ و هونەر نەبێ مافی؟
هەموو مەزگەوتەکانی پێنج فەڕزە
بانگی «الله اكبرعەرەبی»ی بەرزە
حەوز و ئاوی تەواوی جێ نۆێژن
نۆێژ نەکەر هەر ئەوانی بێنۆێژن
خۆشە ئاو و هەوای نە گەرمە نە سارد
پڕە عەمبارەکان لە گەنم و ئارد
باوکی گشت ئەو هەموو کوڕ و نەوە بوو
عاشقی نانی گەنمی «یەکشەوە» بوو
شاری بۆکان «حەقیقیناسناوی ئەدەبی» لێرە ئەژی
شوکری ئاو و هەوات نەکا چە ئەژی