شەماڵ
لە کتێبی:
دیوانی سەیدی
بەرهەمی:
سەیدی (1785-1849)
2 خولەک
698 بینین
شەماڵ مەگێروو وەنەت نزایێ
ئەر بە نزاو من ببۆت ڕەزایێ
تاقەت چێم بڕیان نەمەندەن تابم
هوون مەشۆ نە جەرگ کزەی کەبابم
یەک شەو بای شەماڵ وەر جە سوب سەحەر
بە دەوان وەلای قیبلەم گوزەر کەر
وەلێ لوانت بەی تەور بە دەو بۆ
شۆ وەلای شیرین، هێمان نە خەو بۆ
پەردەی ناز جە ڕووش بدەر وەلاوە
بۆسە دەر بە قورس قەمەر سیماوە
چین چین دەستەی زوڵف خەم وەردەی جەمین
پەرچین نە دەوران گوڵ باغچەی جەمین
مازە پەشێویان بە ڕووش وە هەمدا
نەک پێوار بۆ مانگ نە دڵی تەمدا
چوون نووری ئیمان نە ڕووش مەدرەوشۆ
با زوڵماتی کوفر ئیمان نەپۆشۆ
وەختێ بای شەماڵ پەرەندەی تیژ ڕەو
شیرین دیدە مەست هۆرمێزۆ جە خەو
جەودەم بە ئیکرام وەنەش سەڵام کەر
عەرزو حاڵی من پەنەش تەمام دەر
شەماڵ وێت کەرە بە زوانوو من
واچە بە شیرین، سۆی چەمانوو من
من قاسید جەلای دەرده‌ارێوەم
کیاستەی دڵی بێ قەرارێوەم
پەی تۆ سەیلی هوون مەشۆ جە چاوش
پەی تۆ جە چاوان دوور کەوتەن خاوش
پەی تۆ بێ ئارام سەرسام و لێوەن
تەن زامی خەدەنگ موژەی تۆش پێوەن
پەرسە شیرینێ مەیل ئێمەش لاوەن؟
یا جە شەرتی وێش چوون زوڵفی خاوەن؟
پەی سەیدیناسناوی ئەدەبی مەرگەن بەبێ یار ژیان
مازە بای شەماڵ بسپارۆ گیان