جوانی تۆ
لە کتێبی:
فرمێسک و زەردەخەنە
بەرهەمی:
دڵشاد مەریوانی (1947-1989)
1 خولەک
978 بینین
ئاخۆ چ جوانییەک بێت کە وا کوێرانە دڵی منی خستە داوی تۆ
فریشتەی دڵ گوڵی کوێستان
چاو کەژاڵی گەش و زۆرزان..!
قەت ڕازی دڵ نەدەی نیشان
کە تۆ گوڵی و من، باخەوان.!
لە هۆش خۆی چوو گوڵی شەوبۆ
کە چاوی کەوت بە جوانی تۆ
بتخانەی منیش هەژارم
بتپەرستم.. کە دڵدارم
گوێت لێ بێ ئاخ و هاوارم
بانگ ئەکەن تۆی تاکە یارم
هێزی نەما کاتێ هەڵۆ
کە چاوی کەوت بە جوانی تۆ
وا لە دووریت ئەی دوو چاوم
ئەشک ئەڕێژم بۆت سووتاوم
چارم نییە و پەشۆکاوم
هەر بە هیوای تۆیە ماوم
مانگی چواردە بوو ڕەنجەڕۆ
کە چاوی کەوت بە جوانی تۆ
***
گیانی دڵە خوای جوانی
تیشکی خۆری دەم بەیانی
تۆ بۆ ژینم وەکو کانی
لە شوێنێکی چۆڵەوانی
قەوسوقەزەح کەوتە ڕۆ.. ڕۆ
کە چاوی کەوت بە جوانی تۆ
***
کەی بێ گیانە دوور لە ئازار
دوور لە دەرد و ئاخ و هاوار
بەتۆ شاد بێت دڵەی هەژار
ئیتر بەس کات گریان و زار
شەرم گرتی گڕی پشکۆ
کە چاوی کەوت بە جوانی تۆ