نێرگسی شەهلا غوڵامی دیدەیی مەخموورتە
لە کتێبی:
دیوانی ئەحمەد موختار جاف
بەرهەمی:
ئەحمەد موختار جاف (1896-1935)
2 خولەک
895 بینین
نێرگسی شەهلا غوڵامی دیدەیی مەخموورتە
گوڵ وەکوو بولبول هەمیشە عاشق و مەجبوورتە
نۆشی دارووی لێوی تۆیە ئەی تەبیبی حاڵزان
باعیسی ژین و حەیاتی عاشقی ڕەنجوورتە
ڕۆژ کە وا ڕوو زەردە سەرگەردانە هەر دێت و دەچێ
شێت و سەرگەشتەی فیراقی ڕوومەتی پڕ نوورتە
بۆ خەرابی و غارەتی مەعموورەیی دڵ چاوەکەم
تیپی موژگانت بەدایم لەشکری مەنسوورتە
پێی وتم هۆشت ببێ ئەو ڕێگە وا من پیا ئەڕۆم
تۆزی ئەو دەرمانی چاوی پڕ لە خوێنی سوورتە
گەر حەقیقەتبینی عاشق لابە نەعلەینی حەیات
جێی تەجەللای حوسنی ئەو دڵدارە کێوی توورتە
تۆ کە شیرینی زەمانی من کە فەرهادی غەریب
حەیفە بۆ تۆ خوسرەوی خووبان ڕەقیب شاپوورتە
بۆ چی عاشق شێتی تۆ وا مەیلی فیردەوست هەیە
بەزمی ئەمشەو جەننەتولئەعلایە دڵبەر حوورتە
گەر نیگاهێکت لەگەڵ مندا ببێ عەیبی چییە
تۆ سولەیمانی زەمانی عاشقیشت موورتە
مەنعی تۆ ناکەم کە بێباکانە خوێنڕێژی ئەکەی
موقتەزای ئەحواڵ و تەبعی سەرکەش و مەغروورتە
ئەم قەسیدە وەختێ هاتە خزمەتت بیخوێنەوە
عەرز و حاڵی بەندەیێکی بێنەوای مەهجوورتە
ئەی دڵە بەسیە هەتا کەی تۆ خەریکی هاتوچۆی
موشکیلە وەسڵی تەمەننای مەتڵەبێکی دوورتە
بەسیەتی تاکەی لە حەق ئەم بەندە بێ لوتفی ئەکەی
ئەحمەدناسناوی ئەدەبیی بێچارە تەنها عاشقی مەغدوورتە