خۆزگە
لە کتێبی:
فرمێسک و زەردەخەنە
بەرهەمی:
دڵشاد مەریوانی (1947-1989)
1 خولەک
1175 بینین
زۆریشم حەز کرد کە ئەو خۆزگەیەم تەنیا خەیاڵێک بوو وەکوو تەم
خۆزگە دێوانەی شاران بوومایە
لە نیوەشەودا مانگ بۆم بدوایە
پێم بوتایە: کەشتی زیوی جوان
وێڵ و ئاوارەی پانتاییی ئاسمان
پێم بڵێ توخوا چەند گیانیان فڕان؟
چەندیشیان بەو بای خەزانە مران؟
چەند لاو لە غەما سەری نایەوە
چەند گوڵ بە شەماڵ نەگەشایەوە؟
خرپە و خشپەی پێ لە ناو چیمەنا
چەند چڵە گوڵیان لە بن هەڵکەنا؟
چەند جار پاراوی خونچەی بەهاران
بە خوێناو کرا لە جێگەی باران؟
ئاخۆ چەندی تر بە کوڵ گریابن
بە تەنیا وێڵی هەردو چیا بن؟
خۆزگە ئەوانەت پێ بوتمایە
پێش ئەوەی کاسەی ژینم بڕژایە