بە گریان قەت نەشۆرا وێنەکەت هەرگیز لە چاومدا
لە کتێبی:
دیوانی عەونی
بەرهەمی:
عەونی (1914-1992)
1 خولەک
1301 بینین
بە گریان قەت نەشۆرا وێنەکەت هەرگیز لە چاومدا
دڵۆپێک کەم نەبوو یادت لە دڵ شووشەی شکاومدا
کە دیتم دولبەرم دڵگیرە لێم، پێم گوت کە بمبەخشە
گوتی: ئەبرۆ و موژەم بۆ کوشتنی تۆ تازە ساومدا
وەها چەسپا لە جەستەم خۆشەویستی تان تەماشاکە
نیگاری خۆت دەبینی چۆن لە ناو خوێنی ڕژاومدا
دڵە ڕەنجاوە کەم وەک هاتە لای تۆ بێ سەرو شوێنە
گوتی: لێرە لە ژێر پێم کەوتبوو ئیمڕۆکە قاومدا
هەڵەی دڵ بوو کە ڕەنجا دلبەرم فەرمووی بتڵێن وابێ
هەتا ماوە دەبێ بەندبێ لە چینی پرچی خاومدا
کە دوێنێ نامەکەم دا دەست سەبا بۆ کۆیی دڵدارم
بەیانم کردبوو دەدرم لەگەڵ ڕێز و سڵاومدا
لە کالای بەرهەمم چەند پارچەیێکم برد لە بازاڕا
بە پارە نەیکڕی کەس لێم بە بێ پووڵ و دراومدا