پارچا دوماهیێ ژ حیکایەتا یازدێ
... ژ لباسێد خوە ژ خاتونێد ئاغا و ئەعیان قەوی شەرمی دبی و بێ کەیف بووی مڕوزی دکەتن وەکو ئێڤارێ پاشا تێتە حەرەمسەرایێ دبینە کو خانم ب مڕوزە، پرس دکەتن کو تەچیە ژبۆی چ بێ کەیفی، ئیجارێ خانم دبێژە، چ بێ کەیف نەبم، ئیروکە عید بووی، ژنێد ئاغا و ئەعیان حەموو ب زێڕ و چەک و خەمل و لباسێد فاخیرە بووین، و ئەو ب وی لباسی و خەملێ دهاتنە دەستێ منێ راستێ، من ژوان شەرم دکر، ئەز خانم بم و لباس و حالێ من ئەڤە بیت، ئەڤە شولەکە نەلائیقە، پاشا دبێژە خانمێ کو مەزنایی ژبۆی تە بەسە، خەمل ژبۆی وان، مەزنایی ژبۆی تە، هندە ژنێد ئاغا و ئەتباع و غولامێد تەهەین، ئەڤ قەدەر ژبۆی تە فەخر بەسە، و ئەڤ غولام و ئەتباع مەژ دوژمنان حەفز دکەن، مەزنایی ب رەعیەت و غولام و ئەتباعان دبی، مەزنایی ب دراڤ و چەک و زێڕان نابی، پاشی خانم ئەڤی خەبەری قەبول ناکە، کو ئیللا من ژی چەک و زێڕ و خەمل دڤێتن، ئیجارێ پاشا دبێژە کو لازمە گوندێد چەند ئاغان ژێ بستینم و چەند ئەتباعان بدەرکەم، کو مواجبێدوان زێدە بمینە و بدەمەتە کو ژبۆی تە ببنە زێڕ و لباس و خەمل، ئیجارێ پاشی چەند رۆژەکان، پاشا بخەف تەنبیهی ئاغا و ئەعیانان دکەتن، کو ئەحوالەکێ خانمێ وەها هەیە، هوون حەموو ئیشەڤ بەرێ صوبەیێ سوارببن و بدەرکەڤنە دەورا هێشە تێ دەستە دەستە بسەکنن، ئیجارێ ئەو ئاغا و ئەعیان دگەل سوارێد خوە میقدارێ سهـ هزار سواران دبن، و دبنە شەش تیپ و هەریەک نێزوکی هێشەتێ دسەکنن و مونتەزری ئەمری دبن، وەکو صوبە روون دبە، خانم ژ پەنجەرا ئەیوانێ نەزەر دکە کو ئەترافێد باژێری سواران دامە دەوری گرتینە، فیلحال تێتن و پاشای ژ خەوێ ڕادکەتن، کو چ ڕازای، دوژمنان دەورا کەلێ گرتینە، پاشا دبێژە خانمێ کو زێڕو لباسێد دوژمنان، بدەرینە و ڤڕێکە پێشیا دوژمنان، بلانێ ئەوان دەفع بکەتن، ئیجارێ خانم دبێژە، دوژمن ب وان دەفع نابن، ئەمان زێڕو لباس ژبۆی من لازم نینن، توڤێ بەلایێ ژ سەرمە دەفع بکە، ئیجارێ پاشا دبێژە کو مەترسە، ئەڤنە حەموو غولام و لەشکەرێد مەنە، کو ژنێد وان تە دگۆت، کو ب زێڕ و جلن، ئەگەر دخوەزی ئەز وان بقۆڕینم و ئەوان ماشێدوان حەموو بدەمەتە ژبۆی خوە بکە زێڕو جل، پاشی خانم دبێژە، تۆبە، من جل و زێر نەڤێتن، ئەگەر دخوەزی ئەڤنە جلێد من ژی ببە بدە غولام و لەشکریان، ب ڕاستی کو مەزنایی ب غولام و لەشکری دبیتن و گەر نە زاڤ بازرگان ژی هەین، کو گەلەک زێڕو جل هەین، لاکین چ فایدە ئەو مەزن نینن، ئیجارێ پاشا تێتە دەرڤە و جەوابێ ڤڕێ دکە ژبۆی سواران کو بلانێ بەلاڤ ببن، و هەر کەس بچنە مالێد خوە، ئێدی سوار جەواب ددەن، کو ئەم بەلاڤ نابین، ئەم دێ ژبۆی خانمێ بچنە تالانەکی و ژبۆی وێ بینین، ژبۆی خوە بدەتە ب زێڕوجل، ئیجارێ ئەو سوارێد ئەعیان و ئاغان قەرەداغێ تالانەکی تینن، میقدارێ سەد هزار قرشی کو بدەنە خانمێ ژبۆی خوە بدەتە ب جل و بکەتە زێڕ، خانم قەبول ناکەتن، کو بلانێ ژبۆی لەشکری بتن، ئەز بێ جل و زێر دبم، لاکین مەزنایی بێ لەشکری نابتن..