جارێک کابرایەکی بەڵخەیی لەگەڵ کابرایەکی ...
جارێک کابرایەکی بەڵخەیی لەگەڵ کابرایەکی عەبابەیلێیی لە بەڵخەوە دێن عەبابەیلێ. بەڵخە هەنجیری زۆر چاکی هەیە. بەڵخەییەکە هەر لە ماڵەوە پڕ گیرفانی ئەکا لە هەنجیر و بەڕێ ئەکەون. کابرای عەبابەیلێ لە پێشەوە ئەڕوا بەڵخەییەکە جارجار لە هەلێکا هەنجیرێک لە گیرفانی دەردێنێ و ئەی تەپێنێتە دەمی. ئەمیش لەبەر ئەوە کە ئەزانێ ئەو هەنجیری پێیە و بە دزی ئەمەوە ئەیخوا و واش ئەزانێ کە ئەم پێی نازانێ جارجار لایەکی بۆ ئەکاتەوە، ئەویش بۆ ئەوە ئەم پێی نەزانێ بای ئەدا و لوولی ئەدا و قووتی ئەدا و ملی گەزێ درێژ ئەبێتەوە! لە ئەنجاما پێی ئەڵێ: ئەرێ برا ئەم گەرووی تۆوە بوو بە چی؟ هەمانە بێ هەر ئەدڕێ، مەشکە بێ هەر ئەدڕێ ئەگەر دوو دەنک لە هەنجیرەکەت بدەی بە من و ئەوی تر بە بێ ترس و لەرزە بە هەموو سەربەستییەکەوە خۆت بیخۆی باشتر نییە؟ کابرا ئەمجا ئەزانێ کە پێی زانی، ناچار بەشی ئەدا!