نە پەنامەوە
لە کتێبی:
هەوارگەی دڵان
بەرهەمی:
سەید تاهیر هاشمی (1915-1991)
2 خولەک
672 بینین
نە پەنامەوە ...
ئارۆ دیا پەیم نە پەنامەوە
جەو قەوس پڕوەی سیافامەوە
بەو تیر موژگان کاری زامەوە
پەی پەڕەی جەرگم تیرێ هەوادا
شیرینکاری ئەو ئەجەل ڕەوادا
تا ئەجەل ئاما وە سەروەخت من
هەی هوو زوو بەرشی گیان سەخت من
ئەجەل وە بێبەش، مەلوول دەس هاڵی
وە پابۆس ئەو ڕووی ئیخلاس ماڵی
وات ئەی نازەنین، مەگەر قەزانی
شەست شەڕ ئەنگێزرومەڵخەزانی؟
چەنی کێشای گیان بێ سزا وهانا
ئیزراییل پەی تۆ لاحەول مەوانا
وات ئەرهەی بەدنام ئادەمی زادان
ڕۆ وە عەزابەر گرۆی دڵشادان
قەسەم وە ئەبرۆی قەوس هوونڕێزم
وە سەرنەی موژان شۆڕ شەڕخێزم
وە دیدەی مەخموور بێ بادە مەستم
وە زۆر بازوو وچالاکی دەستم
وە باڵای بێخەوش تووبا سایەی وێم
وە ڕێزە ڕازان حەیات مایەی وێم
ئەر دەرکارم بۆ دیسان جە نۆوە
ئی مەردە پەرێم زیندە مەبۆوە
ئێد وات، ڕوو ئەومن پانیا ئەوپێش
بەو نۆشین لەبان ڕێزەی ڕاز وێش
بە وێنەی یاسین وەندش نە گۆشم
دەنگ ماما نە گۆش، وێنەی سرۆشم
وات: من لەیلەکەی پڕ وەفا ومەیلم
دەروون جە مۆبەت قەیس وێم کەیلم
ئەر زیندە بیوە، هەی مەینەت مایەم
بێگز میاوی بەکام و وایەم
دیسان ئاماوە گیان وە لاشەمدا
وە لاشەی بیمار بەخت چەواشەمدا
ئەجەل ئیدش دی، ساف و بەرمەڵا
واتش: ئەی دڵبەر ئەڵڵا و ئێوەڵڵا