سەرهەردان گێڵەن
لە کتێبی:
هەوارگەی دڵان
بەرهەمی:
سەید تاهیر هاشمی (1915-1991)
2 خولەک
639 بینین
سەرهەردان گێڵەن ...
چوون ئاهووی وەحشی سەرهەردان گێڵەن
مەست مودبەر ماس، ڕەند ڕەوێڵەن
پەی قەزای عاشق کەمەند وە پێڵەن
پەخش بیەن بۆی مشک زوڵفش نە کاوان
عیشوەش دەوبەردەن نەچەم سیاوان
نمەز، وێش نەچیر یاخۆ سەیادەن
کول ئاڵەم وە تیر غەمزەش بەربادەن
جەمینش کەوکەب سەعد ئەکبەرەن
شۆخەن، شەکەر ڕاز، تەرکەن دڵبەرەن
شۆڵەش بە وێنەی زوهرەی سوبخێزەن
هوون قافڵەی عاشقان ڕێزەن
بەو قاش قەتران شۆخ کەمانەوە
بەو تیر موژگان گیانستانەوە
بەو دەستەی حەیتار کرژ لوولەوە
بەو باڵای بێخەوش چوون نەی توولەوە
بەو نیمنگای ناز پڕ جە ئیماوە
بەو قورس ڕوخسار سەمەن سیماوە
بەو لاڵ لەبان یاقووت بێزەوە
بەو نوقتەی خاڵان دڵئاوێزەوە
بەو مینای گەردەن سیم سافەوە
بەو کەتوون کۆی زوڵف، مشکنافەوە
بەو خەشم و غەزەو قەهر وبەڵاوە
بەو بە گۆشەی چەم دیسان دیاوە
قیبلەم کێت نەکەرد دەیری و دێوانە
کێ نەبی پەی تۆ ڕسوای زەمانە؟
چەند کەس وێنەی قەیس لێوەی بیدی گێڵ
لونگ سەودای دەرد تۆش وستەن نە پێڵ
چەند کەس چون فەرهاد، ماڵ نەکۆساران
شین وستەن نە پای بەرزە مەغاران
چەند کەس چوون وامیق، دڵ خەستەی سۆزان
مەگێڵۆت نەپەی، هۆزان بە هۆزان؟
ئەی لەیلێ، چەند هوون ناحەقت کەردن
چەند مەجنوون پەی تۆ ئەروا سپەردەن
ئەی شیرین، چەند کام فەرهاد تاڵ کەردی
چەند کەس چون فەرهاد وێران ماڵ کەردی
ئەی عەزرا، چەند کەس دەروون چاک کەردی
چەند وامیق غەڵتان هوون و خاک کەردی
حەیفەن ئەو گەردەن شەمس تەڵاتەور
دەین خەمباران بکێشۆ وە جەور
فەردا جەو دیوان، ئەگەر پەرسان جێت
چێش مەدەی جواب دەردینان وێت؟