serherdan gêłen
From the Book:
Hewargey Diɫan
By:
Seyyed Taher Hashemi (1915-1991)
2 minutes
669 views
serherdan gêłen ...
çûn ahûy weḧşî serherdan gêłen
mest mudber mas, řend řewêłen
pey qezay ’aşiq kemend we pêłen
pexiş byen boy mişk zułfiş ne kawan
’îşweş dewberden neçem syawan
nimez, wêş neçîr yaxo seyaden
kul ałem we tîr ẍemzeş berbaden
cemînş kewkeb se’d ekberen
şoxen, şeker řaz, terken diłberen
şołeş be wêney zuhrey subxêzen
hûn qafłey ’aşiqan řêzen
bew qaş qetran şox kemanewe
bew tîr mujgan gyanistanewe
bew destey ḧeytar kirj lûlewe
bew bałay bêxewş çûn ney tûlewe
bew nîmnigay naz piř ce îmawe
bew qurs řuxsar semen sîmawe
bew lał leban yaqût bêzewe
bew nuqtey xałan dił’awêzewe
bew mînay gerden sîm safewe
bew ketûn koy zułf, mişkinafewe
bew xeşim û ẍezew qehir wibeławe
bew be goşey çem dîsan dyawe
qîblem kêt nekerd deyrî û dêwane
kê nebî pey to řisway zemane?
çend kes wêney qeys lêwey bîdî gêł
lung sewday derd toş wisten ne pêł
çend kes çun ferhad, mał nekosaran
şîn wisten ne pay berze meẍaran
çend kes çûn wamîq, dił xestey sozan
megêłot nepey, hozan be hozan?
ey leylê, çend hûn naḧeqit kerdin
çend mecnûn pey to erwa siperden
ey şîrîn, çend kam ferhad tał kerdî
çend kes çun ferhad wêran mał kerdî
ey ’ezra, çend kes derûn çak kerdî
çend wamîq ẍełtan hûn û xak kerdî
ḧeyfen ew gerden şems tełatewr
deyn xembaran bikêşo we cewr
ferda cew dîwan, eger persan cêt
çêş medey cwab derdînan wêt?