سنوور
لە کتێبی:
دیوانی ئەسیری
بەرهەمی:
ئەسیری (1895-1962)
1 خولەک
626 بینین
کوردە دەزانی لە کوێ جێگرە خزمانی تۆ
گوێ گرە بۆتی بڵێم جێگەیی قەومانی تۆ
کێوی تۆرۆس و عومقی حەوزەکەی ئەسکەندەروون
غەربییە تا بەحری ڕەش، سەرحەدی مەیدانی تۆ
بەحری ڕەش و ئەردەهان، ئاوی ئەراسە بزان
حەددی شیمالە ئەمە بۆ کۆچ و جەولانی تۆ
ئەڵوەن و گۆلی ئورمێ، تا سەری ئاوی ئاراس
سنووری ڕۆژهەڵاتە جۆگەو و کێوانی تۆ
ئەهواز و کێوی حەمرین، ژەنگار و ڕێی نسەیبین
سنوورە بۆ جنووبی باغچە وو باغانی تۆ
لە ناوی ئەم سنوورە دوانزە ویلایەت هەیە
دەڵێن دوانزە ملیۆنە نفوسی کوردانی تۆ
حاشا درۆیە وترا نفووسیان نەنووسرا
دەگاتە بیست ملیۆن بنووسرێ قەومانی تۆ
لەدەر بەئەم سنوورە لە ئەنقەرە و خوراسان
بلووش و ئەزەربەیجان، لەوێشە خزمانی تۆ
ئەی وەتەنی خۆشەویست ناوتم ئەوجا کە بیست
منداڵێکی ساوە بووم، دەبوومە قوربانی تۆ
وتەی وڵاتی کوردە، لەلای تۆ هەر وەک ویردە
ئەسیریناسناوی ئەدەبی ئەم حاڵەتە دەلیلی ئیمانی تۆ