ماتەمنامە
لە کتێبی:
دیوانی ئەسیری
بەرهەمی:
ئەسیری (1895-1962)
1 خولەک
587 بینین
رەش دەپۆشین، شیوەنە کوردین لە مانگی ماتەمین
ڕۆژی قوڕپێوانە ئەمڕۆ مێزەر و سەرپۆشە شین
ساڵ بەساڵ ئەم ماتەمە دەگرین لە بیرمان دەرنەچێ
تا زەمانی تۆڵە دێ ڕۆژێکی وا خوڕەم ئەبین
شێخ عەبدولقادر و چەن سەد ڕەئیس و، شێخ سەعید
لەم دەمە بوونە فیدایی نیشتمان و گەل، دینی موبین
شێخ عەبدولقادر ئەم زوڵمە گرانەی لێ کرا
دیارە ئەرشەد بوو لە ئەولادانی فەخرولمورسەلین
بۆ نەسووتێ دڵ، جگەر بۆچی نەبرژێ وەک کەباب
سەرکز و عاجز خۆمانین، دەردەدار و دڵ حەزین
بێ هیوا وو بێ پەناو و بێ بەش و، بێ جێ و ڕێ
گۆشەگیری ناعیلاجین، دوور لە خەڵک و بێکەسین
چەن هەزارێکمان بەسێدارە بەناحەق بوون شەهید
سەد هەزار کوژراومان ئێستەش لەسەر ڕوویی زەمین
سەد ئەوەندە زوڵم هەبێ، دەردیش هەزاران بێتە پێش
هەر لەسەر ئەم بیرە وو ئەم ڕێگەیە سابیت ئەبین
مەرد ئەوە ماڵ و سەر و موڵکی لە ڕێی حەق دابنێ
ئەی ئەسیریناسناوی ئەدەبی هیچە لای عاقڵ بەنامەردانە ژین