فەڕی زانین
لە کتێبی:
دیوانی ئەسیری
بەرهەمی:
ئەسیری (1895-1962)
2 خولەک
608 بینین
بوون بەسەرگەورە بەعیلمە نەک بەباڵا وو جەمال
عیلم کەسبی پێ دەوێ مومکین نییە بوونی بەماڵ
غوربەت و تەرکی وەتەن، ڕەنج و ڕەزیلیی پێ دەوێ
تەرکی قەوم و خزم و ئەرباب و کەس و ماڵ و مناڵ
چەند زەمانێکی موەققەت، ئەم جەفایەی پێ دەوێ
پاش ئەوە ڕۆڵە ئەبیتە خاوەنی جاهو جەلال
کارگەر و زانا نەبی، هیچی لەپێش چاوی بەشەر
هەرچەنێ زۆرت بگاتە مەرتەبەی زۆراب و زاڵ
گیانی پاکی هاونشینیی زندەیی ژووران ئەکا
ئەو خوا پێداوە زانینی گەییبێتە کەماڵ
خۆش ئەکۆشێ خۆش ئەپۆشێ خۆش ئەنۆشێ ڕۆژ و شەو
دێتە بەردەستی بەسووکی خوورشی چاک و حەڵاڵ
ژین و خۆش خۆری ئەلەم دنیایە گەر بۆی دەس نەدا
حورمەت و قەدری هەیە لای پیر و جاهیل و مناڵ
سۆفییەک عیلمی نەبێ، دایم لە مەعنا بێ بەشە
سیحرە ئیستیدراجە، دیتت جاهیلێ بفڕێ بەباڵ؟
داخیلی ئەشرافە، گەورەی خەڵکە پیاوی خووندەوار
ئەو کەسەی نەیخوێندبێ، دەڵڵاڵە، بەققاڵە، حەماڵ
بیژمێرم فەڕڕی خوێنین و، نەزانین، بێ فەڕڕی
لاپەڕەی ڕۆژنامەکەت، ناکا لە بۆ چاپی مەجاڵ
ئەی ئەسیریناسناوی ئەدەبی چاکیی زانین بنووسی ڕۆژ و شەو
نایێتە کۆتا لە زانینا وتە و شیعر و مەقال