مودیری جازیبە
لە کتێبی:
دیوانی ئەسیری
بەرهەمی:
ئەسیری (1895-1962)
2 خولەک
717 بینین
ئەی مودیری جازیبەی گۆیان و زەڕڕەی کائینات
شایەدی بوونی تووە سووڕانی مانگ و ڕۆژهەڵات
بیری لاپلاسی لە فیساغۆری چاتر شایەدە
گۆی بڵندانی زەوی گەڕدیدەیی چۆلی سەرات
چوومە کارخانەی ئەلەتریکی، کە نواڕیمێ بەدڵ
سەربەخۆ مومکین نەبوو هەرگیز پەیاکا تەرتیبات
دووکەڵی ڕۆشن بووە مێژووی بڵندانی زەوی
وا ئەسیری پێ دەڵێن پەیدا چلۆن بوو کۆوەهات
فەرمەسۆنان وادەڵێن بێ ماددە پەیدا نابێ هیچ
ماددە نەبوو، چۆن پەیا بوو ئەو تەمەی ڕەنگ ڕۆشنات
بەندەکانت هەندێکی ڕێگای بەهیوا بردووە
گوم بووە، هەندێکیشی شێواوە داماوە لەڕات
هەور و با و باران و ڕۆژ و شەو هەمووی پێویستییە
حیکمەتی تۆیە فەقیری و دەوڵەمەند، هات و نەهات
لەم ئیدارەی تۆ کە دەیکەی تێ دەنۆڕم چاترێ
بۆ بەنی ئادەم نییە، بۆ ڕێکی وو پێکیی وڵات
عاجز و دامەندەیی زانینی کار و کردەتە
سەد هەزارێکی وەکو لوقمان، ئەرەستۆ و سوقرات
هەر لەیەک عەردا هەوایەک، ئاوی یەک ڕووناکی یەک
بەر ئەدا زەهرە یەکێکی، نۆشە ئەودی دوو نەبات
تۆم ئەگەر تەئسیری ئەم جۆرەی بوایە سەربەخۆ
دوونەوەی ژێری، لەژیری و کۆڵیدا چۆن فەرق ئەکات
تۆ هەیو نابینرێی بێ جێ، لە هەمموو جێیێ هەی
ڕۆح و عەقڵی خۆم دەلیلێکە لە دەسما وەک بەرات
ڕێکیی دەوری جیهان تێک ناچێ دیارە هەر یەکی
بەم یەکیت دیارە نییە ڕۆڵە و کەس و باوک و برات
ڕۆحی گەورە تۆ چیی و چۆنی بڵێم حەددم چییە
بیری پەششە بۆ چڵۆنیی گۆی زەوی چۆن ڕێ ئەکات
یاخوا، بێ جێیە ئەم گوفتارە گەر عەفوم نەکەی
ڕوو لە کوێ کەم کێ نەجاتم دا لە ڕۆژی عەرەسات
زیندووە مردووی هەزار ساڵە ئەگەر مەیلت ببێ
هەر لەسەر نوو عالەمێ پەیدا بکەی هیچە لەلات
ئەی خوا ڕەحمێ بەقەومی میللەتی کوردم بکە
مەیل و فەرمانت ببێ ئاسانە، زوو پێک دێ ئەوات
لاوی من تۆ کارگەری و زانین و، پەیدا کە دراو
ڕوو لە دەرگەی خوا دوعا کا سەیید و شێخ و مەلات
زوو بەزوو پێکدێ (ئەسیر) ئەوجا هیوایی گەلت
بەخششی زۆرە دەهەندەی نابڕێ هەڵبەت خوات