مۆم

کاتێ خەونەکانی پێشووم
گۆزایانەوە نێو هۆڵی فەرامۆشی و
کاڵ بوونەوە
هێندەی پەستیی کەنینەکان باڵام کرد و
بە قەد باڵای خەمەکانیش بە عەرزا چووم
ئەمجارەشیان
«نەوا» هات و خۆشەویستیی خاک و دایکی
بۆ هێنابووم
فرووغیش ئاوێنە و چرا
لەولاشەوە مۆمێکم دی
سەر تا دامان داییسابوو
لەگەڵ هەر چەپکە تیشکێکا
باڵای کورت و کورتتر ئەبوو
ڕامکرد بۆ لای
بۆنی گوڵ و شاخ و کانی
سۆزی تاسە و چاوەڕوانی
بۆ هێنابووم
پڕی دایە قژەسەری و
چەپکێ تیشکی سوور و سپی پێشکەش کردم
هەر ئەو ساتە لەبەر شەوقی دیارییەکەیا
پەخشانێکی سەوزم نووسی
بۆنی خاک و دایکی ئەدا
بێبەش لە ئاوێنە و چرا