تاریکی و نوور

لە کتێبی:
گوناهـ
بەرهەمی:
عەلی حەسەنیانی (1939-1992)
 1 خولەک  1435 بینین
تاریکی و نوور
بە دەنگی: عەلی حەسەنیانی
:ئەتۆ جوانی!
ئەتۆ گیانی!
ئەتۆ سروەی شەماڵی بەربەیانانی!
ئەتۆ وەک دیمەنی خاوەن شکۆی کوێستانی کوردانی...!
 
:ئەمن دارێکی ویشک و ڕووتی بەرتاوم،
ئەمن کۆشکێکی ڕووخاوم،
بەجێ ماوم...
 
:ئەمن کوێستانی تەمگرتووم،
لە پێ کەوتووم،
لە دەشتی بەربەرینی چارەنووسا ڕەنجەڕۆ ماوم.
بە زنجیری ئەوینی تۆ لە زیندانی خەما بەسراو و داماوم،
لە ڕژدی بەندەنی عیشقت پشووبڕ بووم،
لە خەم پڕ بووم...
 
:ئەتۆ دڵخوازەکەم، ئەی کۆترەباریکەی لە دەس دەرچوو!
لە سەر پاساری کۆشکی پڕ ترووسکەی ژینی ڕابردوو،
لەگەڵ زەردەی گەڵاڕێزا،
لە شەققەی باڵەکانت دا...
بە داماوی بەجێت هێشتم لە نێو ئادەی خەم و زیندانی هەڵبەستا...
من و تۆ چەندە لێک دوورین...
وەکوو تاریکی و نوورین...