جوانەکچ

لە کتێبی:
گوناهـ
بەرهەمی:
عەلی حەسەنیانی (1939-1992)
 1 خولەک  1923 بینین
جوانەکچ
بە دەنگی: عەلی حەسەنیانی
جوانەکچ
بە دەنگی: عەلی حەسەنیانی
جوانەکچ
بە دەنگی: سەید خالد ئیمامی
ئەی جوانەکچی چەشنی گوڵی سووری موکریان!
لەو ڕۆژەوە تۆم دیتووە شێواوە ژیانم
ڕۆیشتی لەگەڵ بۆنی بەیانانی هەڵاڵان
من ماوم و تەنیایی و فرمێسکی شەوانم
***
ئەی هاوبەشی ڕۆژانی پڕ ئاواتی لەدەسچووم!
سەد خۆزگە بە ئەو ساڵە کە دڵ گەرمی ئەوین بوو
ئەمڕۆ کە ئەگەر چەشنی خەزەڵ زەردم و کەوتووم
ئەو دەم خەمێکی نەمبوو بە مەرگت خەمی ژین بوو
***
ئەی بووکی دڵم! پڕ بە دڵم تۆ دەپەرەستم
لەو ڕۆژەوە جێت هێشتووم عەزادارم و ماتم
هەر چەندە دەزانم کە ئیدی نایەوە دەستم
تا ڕۆژێ بەشم دەبڕێ لە دنیا بە تەماتم
***
ئەی سوێسنی بۆنخۆشی لە ئاسۆگی هەواران!
کاری منی ئاوارە لە دووریی تۆ کراوە
جارێ بکە یادی منی دوورکەوتوو لە شاران
تا ڕایەڵ و پۆی نیوەژیانم نەپساوە
***
ئەی تاقە ستێرەی شەوی بێ نووری ژیانم!
هەوری ڕەشی بەختم بە خودا تۆشی لە من کرد
هاوارە لە من دیلی ڕکەی بەندی گرانم
تۆ ڕۆیی و من مردم و ئاواتی دڵم مرد...