قر و هەوار
لە کتێبی:
شەفاق
بەرهەمی:
جگەرخوێن (1903-1984)
2 خولەک
998 بینین
ئەو کەسێ دل کەتیە بەندێ، گوهـ ددی زارێ دمن
گرتیێ داڤ و کەمەندێ، زانی گوفتارێ دمن
ئێ ئەڤیندەری نەدبی، نابی هەڤکارێ دمن
ئێ نەدیبی، ئەو چ زانی، قیر و هەوارێ دمن؟
ئاگرێ دل کرنە دۆژەهـ، رۆژ و ئێڤارێ دمن
دل ژ مزگەڤت و کەنشتێ، گرتیە، چبکم نمێژ؟
ئەڤ ئەڤینا من د دلدە، ژانەکە دوور و درێژ
ئەز ژ بەر ژانا ئەڤینێ، مامە سەرگەردان و گێژ
مال و جان بەردانە جارەک، لێنە ئیرۆ، هێ ژ مێژ
دا بزانی، وەر بخوینە، رست و گوفتارێ دمن
دەستێ سادە من نەدینە، ئەز ب کێ باوەر بکم؟
ئەڤ جهان پێکڤەنە دۆستە، ئەز ب کێرە شەر بکم؟
ئەز دل و جەرگ و هناڤان، پەرچە پەرچە کەر بکم
ئاگرێ دل دۆژەهە، ئەز نکارم دەر بکم
لێ کییێ گوهدی ل: قیر و نال و زارزارێ دمن؟
شۆخە یا من دل ب دەستە، کێ دیە وەک وێ جوان؟
ئەز خولامێ هەردوو سێڤان، هەردوو لێڤێن ئەرخەوان
من د بەندا وێدە هشتن، بوویە چل سال: جەرگ و جان
بێ کو جارەک ئەز ببێنم، ئەڤ چ رەوشە، سەد ئەمان!
کی دکاری هلگری، ڤی بار و سەربارێ دمن؟
گەر سپیدێ دەرکەڤی، جارەک ژ نێڤ برجا بەلەک
خوەش ب سەر دێماندە بەردی، هەردوو بسکێ رەشخەلەک
کێنگی وێ جارەک ل نک من، روونی ئەی چەرخا فەلەک؟
لەشکەرێ خەم ئەز د بەرڤە، راکشێنم لەک ب لەک
دا ب سایا سیمە چیمێ، گوهدی قارقارێ دمن