ئاهـ ژ دەستێ دووریێ
لە کتێبی:
شەفاق
بەرهەمی:
جگەرخوێن (1903-1984)
1 خولەک
1010 بینین
ئەڤینا دل چ بێژم ئەز؟ ژ تە دووری وکی بەنجە
هەیە چل سال د نێڤا دل چکاندن وێ لەپ و پەنجە
دبێنی پیر و کالم ئەز شەڤ و رۆژان دنالم ئەز
شکەستی رەنگێ دالم ئەز د دلدە: ژان و ئەشکەنجە
دزانم ئەڤ چ تارخە د سنگێ دە برن میخە
د دلدە من چ سۆر - سیخە؟ مە ژێ خوارن دو سەد رەنجە
دخوم ڤێ رەنج و ڤێ ئێشێ ددم ڤێ باج و ڤێ بێشێ
د وێڤە بوومە وەک مێشێ کو ئەڤ ژینا مە خوەش گەنجە
وەرە ئەی شۆخە - کورمانجێ! کو زوو بغێمە ئارمانجێ
مەگەر ئەز دل بدم باجێ گەلەک هێژا و پر قەنجە
وەرە ئەی سەروە - بالا من! شکەستی - بسک ژ دالا من
وەرە روودێم ب خالا من ب ناز و لار و خوەش لەنجە
وەرە جارەک د سەرسالێ بنێرم ئەز ل وێ بالێ
ل وان برهێن وەکوو دالێ ل وان بسکێن رەش و مەنجە
دزانم کو تو دلسۆژی مەگەر دووری ژ من داژی
وەرە جارەک بەری رۆژی کو بێ روونن ل نێڤ کونجە
تو زانی کۆ جگەر خوینە نە دنێ لێ کرم دینە
ژ وان لێڤێن شرین بینە شەرەبا: سێڤ و ئەترونجە.