برای شیرینم ئەی کاکی خۆش ڕەوت

بێ نەوتی
لە کتێبی:
دیوانی ویساڵی
بەرهەمی:
ویساڵی (1902-1973)
 1 خولەک  629 بینین
برای شیرینم ئەی کاکی خۆش ڕەوت
ئاگادارت بێ ساحێبی مزگەوت
دەخیل سەد دەخیل فریامان کەوە
با لە تاریکی شەوا نەبین فەوت
یەک تەنەکە نەوت بە زووترین کات
ئەبێ پەیدا کەیت، هەر چۆن بۆت هەڵکەوت
ئەگەر زووبەزوو بۆمان نەنێری
ئەبێ هەموومان سەر بنێین لە جەوت
کاتێ ئەچمەوە ئێوارە بۆ ماڵ
ئەو ماڵە لە من ئەبێ ئەشکەوت
شەوێ تا سەحەر لەلا خۆم ئەنووم
ئێستاش و ئەوسایش چاوم هەر نەخەوت
بە شەو تەماشای سەعات کە ئەکەم
تاریکی هەشتم لێ ئەکا بە حەوت
ئەی داد زەمانە لەبەر بێ نەوتی
چلۆن عالەمت خستە کەوتن و ڕەوت
گەلێ هەوڵم دا بە هەر چوار لادا
لەم تەنگانەدا کەس فریام نەکەوت
سکاڵام زۆر کرد لا قەومان و خوێش
فائیدەی نەبوو نەوتم دەست کەوت
ئەگەر تۆش نەوتی بۆ پەیدا نەکەی
لە شیعرا ناوت ئەبا بە جل چەوت
هیچ لێم مەپرسە ئەحواڵت چۆنە
سەر لێ شێواوم کاکە بەبێ نەوت
ویساڵیناسناوی ئەدەبی حەتمەن نەوتی ئەوێ لێت
ئیتر مەیدەرێ لەوە زیاتر سەوت