تریفەی مانگە شەو بریقەی کلاوزەر
هاوینی بەرزنجە
لە کتێبی:
دیوانی مەزڵووم
بەرهەمی:
مەزڵووم (1916-1955)
1 خولەک
951 بینین
تریفەی مانگە شەو، بریقەی کلاوزەر
شێوەی مەحبوبان، دێتە بەر نەزەر
سەدای لایلایەی تازە جوانان
ئەلاوێنێتۆ، دۆست و مەعشوقان
کزەی بای شەماڵ کە دێ بە جارێ
بۆی گوڵێ دێنێ لە باغچەی یارێ
قاسپەی نێرە کەو وەختی نیوەشەو
دەنگە بۆ عاشق ڕاپەڕە لە خەو
جریوەی چۆلەکەی بەیان لە ئاسمان
بەستە ئەخوێنن وەکوو عاشقان
شنەی بای سەحەر ئەشنێتەوە
بە ناز گوڵەکان ئەلەرێتەوە
بولبولی هەژار لەم چڵ بۆ ئەو چڵ
بێ پەروا ئەڕوا لە تاو عەشقی گوڵ
سینەو باغچەی بەی، پۆلی نازداران
هاوتایە لەگاڵ سپێدەی بەیان
گۆنای نازداران بە ڕەنگ ئاڵ و سوور
سیوەیل لێیداوە، نەک سووراوی سوور
شێوەی جەوانان بە وێنەی غیلمان
مەملەکەت جەننەت هەم ڕەوزەیی ڕیزوان
نەخشاوی سنعەت زاتی کردگار
بۆ مەزڵوومناسناوی ئەدەبی مەدحی نایەتە گوفتار