بڕوام
لە کتێبی:
تریفەی هەڵبەست
بەرهەمی:
شێرکۆ بێکەس (1940-2013)
1 خولەک
2098 بینین
ڕێگای بیرم، بەناو هەزار داوی باریکا
ئەڕوا، بەرەو خۆری ئاسۆی ئامانجی ڕوونم
چاوی تیژی کوردایەتیم لەڕێی تاریکا
چراوگی ڕۆژ، ئەداتە دەست، دەستی دەرچوونم.
***
هێزی ئەژنۆی، شلنەبوونی تێکۆشانەکەم
هەوراز لەدوای هەورازی سەخت، ئەشکێنێ، ئەبڕێ
بەرەو لووتکەی هیوای گەورەی نیشتمانەکەم
لەناو گەلدا، یەکەم ڕیزی سەرکەوتن ئەگرێ.