ئەگەر لوتفت ببێ ڕۆژێ بپرسی چۆنە ئازارت
لە کتێبی:
دیوانی عارف عورفی
بەرهەمی:
عارف عورفی (1896-1961)
1 خولەک
578 بینین
ئەگەر لوتفت ببێ ڕۆژێ بپرسی چۆنە ئازارت
ئەکەم گیانم فیدای زارت کە ناوم بێتە سەر زارت
فەلەک زانی کە ئەشعارم لەسەر ئەوسافی ڕووی تۆیە
«شکاندی پەنجەکانم تاکوو نەنووسم وەسفی ڕوخسارت»
دەمێکە بێ سەر و شوێنە دڵی من، تازە پێم زانی
ئەسیر ماوە لە بەندی داوەکەی زولفی سیەهـ مارت
مەکە مەنعم ئەگەر گۆشەنشینی خەڵوەتم ئیمڕۆ
هەمیشە دوورپەرێزم لێت لە ترسی تەعنەی ئەغیارت
لەجیاتی ئەم هەموو قەهرەی لەڕووی تۆوە کە چێشتوومە
خوا نەمهێڵی گەر حەز کەم سەری موویە لە ئازارت
سەبەب من بووم لە تەعریفی خەت و خاڵت کە وا ئیمڕۆ
لەناو جەمعی جوانانا شکور وا گەرمە بازاڕت
لەسەر وەسفی گوڵی ڕووتا ئەبینم جوملە ئەشعارم
کە شیرینە بە شیرینی وەکوو لێوی شەکربارت
لە هیچ لایێ، نەبێ لایێ عیلاجی دەردەدارێ کا
ئیتر عورفیناسناوی ئەدەبی بۆ لای کێ بەی بپرسێ دەرد و هاورت