ماتەمێکی تازە بۆ مەیدانی ژین پەیدا ئەکەم
لە کتێبی:
دیوانی ڕاجی
بەرهەمی:
ڕاجی (1912-1969)
2 خولەک
117 بینین
ماتەمێکی تازە بۆ مەیدانی ژین پەیدا ئەکەم
ڕۆژی مەرگی خۆم لە ئوفقی پەرچەمی ئاوا ئەکەم
سەر هەڵێنە، هەڵبڕە چاوت لە بازاڕی هەوەس
تا بزانی ئاڵ و واڵای سۆز چلۆن سەودا ئەکەم؟
ئێوە ناسیار و، ئەمن شێوەی غەریبم بێتە ڕوو
پێچە لادە، جەژنی دڵ، لەملاوە وەک ئەولا ئەکەم
سوخمە سەوز و ئاڵ بگرێ دەستی یاریدەی بڕین
جەرگی هەڵقرچاوی خۆم، بۆ دەستبڕیی وریا ئەکەم
من کە بەختی گیان ئەکەم لەم شاری عیشقە، بێ ڕیا
کەس بناسم یا نەناسم، فەرق ناکەم، وا ئەکەم
ناوی گەر بێنن، نەزاهەت پڕ دەبێ ئیمان و دین
ڕۆژی حەشرم ڕا ئەبێ، جەننەت پڕی تووبا ئەکەم
دادی من لەم شارەدا ناپرسرێ، ئەی خونچەدەم
بۆیە وا پڕ زار و دڵ، هاوار ئەکەم، هیوا ئەکەم
گەر ئەڵێی ڕۆژووگرم، زەردەخەنەت ئەمباتەوە
بەرگی ئیسلامیی ئەپۆشم، کردەوەی تەرسا ئەکەم
پێم ئەڵێ دامردووی، «کاکە ڕەسوڵ»م ئەمکوژێ
من کە بادەی مەرگ فڕکەم، دیارە ئیشی چا ئەکەم
چونکە شای شەترەنجی عیشقم، چوومە بەندی شاڕوخی
سەرکز و ماتم، وەڵاتم، گەردەنی ئازا ئەکەم
من کوڕی عیشقم ئەگەر جاحێل و گەر پیرم، ئیتر
پەیڕەوی باوکانەمە، گەر چاک و گەر بێ جا ئەکەم
نامەوێ لەم کاتە کورتەمدا، هونەر دەرخەم لەلات
بۆیە وەک چاوی دزان، تا خۆم پەنادەم ڕا ئەکەم
جگ لە ڕۆحم، قیمەتی ماچم لە باخەڵدا نییە
وا ڕجای «کاک ئەحمەدکەس» و، پێغەمبەر و مەولا ئەکەم
تا ملم کەچ کەم لە مزگەوت و بە خەونم بێیە ڕوو
ڕمب و هۆڕی دڵ، چ شێخانە بە ئیللەڵڵا ئەکەم
ڕاجیاناسناوی ئەدەبی، سەد کەس ئەڵێ تۆ هەمسەری پەیمانە نی
من کە خۆم ناسیوە بۆچی خەم ئەخۆم، بڕوا ئەکەم؟!