گوڵی جێ ماو
لە کتێبی:
دیوانی کاکەی فەلاح
بەرهەمی:
کاکەی فەلاح (1928-1990)
1 خولەک
1163 بینین
ئەی ئەو کەسەی هەمیشە
پیشەت کۆشش و ئیشە
بە سەرگەرمی بێ وچان
لەسەر ڕێگەی هەوڵدان
تاکوو دواهەناسەی ژین
بەخت ئەکەی تەوژم و تین
بە ڕەنجی شانی بازوو
بە گاسنی بێ پشوو
جەرگی زەوی دەر ئەدەی
تۆوی بەسەردا ئەکەی
بە ئارەق و ئەشکی چاو
پەروەردەی ئەکەی تیر ئاو
جا بە داسی بزوتن
ئەکەویە درەو کردن
لەگەڵیا ئەکەویە خۆ
پێی ئەبڕی بەرگی مەڵۆ
لەوێ لەسەر پشتی ورد
گێرەی ئەکەی دەست و برد
بە شەنی بێ وچانی
لێک ئەکەی پوش و دانی
دوای ئەو ئەمجا کێشەوە
خۆی ئەکوتێ بۆ پێشەوە
سەروەری گوڵی جێماو
هەر تۆی تۆ ئەی بەجێماو
ڕەنج و کنەی ڕۆژ و شەو
کردەی تۆیە و بردەی ئەو