پێنجخشتەکی لەسەر هەڵبەستێکی «عوسمانی وەجاخی»
لە کتێبی:
کڵپەی دەروون
بەرهەمی:
مەلا عەبدولڕەحمانی فاتیحی (1930-2002)
3 خولەک
380 بینین
هەوای دنیا منی فەوتاند، ئەمن بۆ حاڵی خۆم چ بکەم؟
لە ڕێی هەق بۆ خودا سەرفی نەکەم سا، ماڵی خۆم چ بکەم؟
لە پێ کەوتووم، ئەسیرم، دوژمنن منداڵی خۆم چ بکەم؟
«ئەوا پیر بووم ئەگەر بیرێ نەکەم لەو حاڵی خۆم چ بکەم
هەتا کەی غافڵی ئەی دڵ، ئەگەر بۆ خوا نەڕۆم چ بکەم؟»
خەمی دنیا ئەبەد ناخوا کەسێکی مەردی ئازا بێ
تەماعی ماڵی دنیا هیچ نییە، هەر ڕووت لە عوقبا بێ
ئەوەی ترسی لە دۆزەخ بێ، ئەوەت پێ چاک و زانا بێ
«کە دنیا فانییە بۆ خۆی وەفاش قەت بۆ کەسێ نابێ
کە وایە من ئەگەر ئیتر لە دنیا دەست نەشۆم چ بکەم؟»
دڵم سووتا لە تاو کۆچی ڕەفیقانم کە ڕابردوون
خەمی خۆتت هەبێ چاوم، مەڵێ یارانی من نووستوون
لە خۆشی و نیعمەتا شادن، ئەتۆ پێت وا نەبێ مردوون
«هەزاران دۆست، برادەر، ئاشنا، هاتوون و ڕابردوون
ئەگەر مردن پەلاماری ئەوا هێنا لەبۆم، چ بکەم»
بە هەر لایێ دەچم جەهل و نەزانی تینی هێناوە
ئەوەی هۆی زیندەگانیم بێ، ئە لەو دنیایە نەمماوە
وەکوو پوڵی چرووک وایە، ئەوەی پێت وایە ئەو پیاوە
«لە بەدبەختی و نەزانیمە، دڵم بەستوە بە دنیاوە
لە ناکاو مەرگ تووشم بێ، دەبینم ڕەنجەڕۆم، چ بکەم؟»
لە دنیا هەر وەکوو گورگین، مەحاڵە بکرێ باشارمان
ئەوەند قورس و گرانە، زەحمەتە هەڵگرتنی بارمان
کە مردین بووینە خاک و خۆڵ، دەمێنێ تاقە کردارمان
«لە ناو ئەو گۆڕە تاریکە، کەسێ نایە لە هاوارمان
بە هەڵمی ئاگری دۆزەخ، ئەگەر کرا ئاورەسۆم، چ بکەم؟»
لە ناو بەحری گوناهاندا، وەها غەرقم نییە شوێنم
کراسی پیس و بەدناویم فڕێ دەم، پاکی بدڕێنم
لەبەر زۆریی خەتا و جورمم، ئەرێ بۆ خۆم نەخنکێنم؟
«بە تۆزی دوکەڵی عسیان، وەها چڵکن و دژوێنم
بە ئاوی حەوزی کەوسەر گوناهانم نەشۆم چ بکەم؟»
بەسە دنیات بەکار نایە، ئەتۆ بۆ هێندە نادانی؟
شەو و ڕۆژ مزگەوت جێت بێ، ئەگەر تۆ ژیر و ئینسانی
هەتا کەی گوێ لە مستی نەفسی ئەممارەت و شەیتانی؟
«وەرە تا فرسەتێک ماوە، بکەین تۆبە و پەشیمانی
ئەگەر لەم ماوەیی کەمدا، خەمێک بۆ خۆم نەخۆم، چ بکەم؟»
لە دنیا خۆشە تا ماوی مریدی ئالی تاها بی
لەبۆ تۆش «فاتیحیناسناوی ئەدەبی» چاکە لەگەڵ پیاوانی خوادا بی
لە حەلقەی زیکر و تەهلیلی کوڕانی با خەبەردا بی
«پەنا بۆ خوا، دروودم بۆ موحەممەدکەس، ئال و ئەسحابی
ئەوە ڕێی چارەیە «عوسمانکەس»، دەنا بێ عوزر و هۆم، چ بکەم؟»